ԵՐԵՎԱՆ, 22 սեպտեմբերի – Sputnik. ՀՀ երկրորդ նախագահ Ռոբերտ Քոչարյանի որդին` Լևոն Քոչարյանը ձերբակալվել է։ Տեղեկությունը հայտնում է նրա փաստաբան Ալեքսանդր Կոչուբաևը։
Նա նշել է, որ այսօր` կեսօրին, ոստիկանության ծառայողները Լևոն Քոչարյանին դաժան ծեծի ենթարկելով բերման էին ենթարկել:
Փաստաբանը Լևոն Քոչարյանին խոշտանգելու փաստով հաղորդում է ներկայացրել:
Կոչուբաևը նշել է, որ քննիչը քիչ առաջ փաստաբանական թիմին է հանձնել ձերբակալման որոշումը, որից պարզ է դարձել, որ «խոշտանգող ոստիկանները հաղորդում են ներկայացրել, որ Լևոն Քոչարյանը 4 կարմիր բերետի ծեծել է»:
«Այս ցնդաբանության հիմքով նախաձեռնվել է քրեական վարույթ, իսկ խոշտանգման մասով տղերքը մտածում են: Սա, իհարկե, իրավական բեսպրիդել է: Լևոն Քոչարյանը ծիծաղով մոտեցավ այս հարցին և կոչ արեց չհանձնվել ու շարունակել պայքարը»,– գրել է փաստաբանը:
Իր գրառման վերջում Ալեքսանդր Կոչուբաևը քննչական կոմիտեին կոչ է արել դիտել մեկնաբանություններում տեղադրված տեսանյութն ու դիմել ակնաբույժի:
Հիշեցնենք՝ սեպտեմբերի 19–ին Արցախի դեմ սանձազերծված ադրբեջանական նոր ագրեսիայի ֆոնին Երևանում մասշտաբային ցույցեր են սկսվել։ Մարդիկ պատասխան են պահանջում ՀՀ իշխանություններից Արցախի հարցում դրսևորած անգործության համար։
Այսօր առավոտից Երևանի տարբեր վարչական շրջաններում քաղաքացիները անհնազանդության ակցիաներ են իրականացնում։ Կարմիր բերետավորներն Ամիրյան փողոցից, բիրտ ուժ կիրառելով, բերման ենթարկեցին ցուցարարների մի մասին։ Նրանց թվում էր նաև ՀՀ երկրորդ նախագահ Ռոբերտ Քոչարյանի որդին` Լևոն Քոչարյանը։
Լրատվամիջոցների ֆիքսած կադրերում երևում է, որ ոստիկանները Լևոն Քոչարյանին բերման ենթարկելիս մեքենայի մեջ ուժեղ հարվածներ են հասցնում նրան։
Ավելի ուշ հայտնի դարձավ, որ Լևոն Քոչարյանին տեղափոխել են «Նաիրի» ԲԿ։ Նրա մոտ ախտորոշվել է փակ գանգուղեղային վնասվածք` ուղեղի ցնցում: