ԵՐԵՎԱՆ, 22 սեպտեմբերի – Sputnik. Երևանի 10 ընտրատարածքային ընտրական հանձնաժողովներն ամփոփել են 78 տեղամասերում իրականացված վերահաշվարկի արդյունքները։ «Քաղաքացիական պայմանագիր» կուսակցության ձայներն ավելացել են 31 քվեաթերթիկով, «Ազգային առաջընթաց» կուսակցության ձայները` 32–ով, իսկ «Մայր Հայաստան» դաշինքինը` 67–ով։ Տեղեկությունը հայտնում է Կենտրոնական ընտրական հանձնաժողովը։
Բացի այդ, հրապարակվել է, թե Երևանի ավագանու ընտրություններին մասնակցած մյուս կուսակցությունները քանի հավելյալ ձայն են ստացել.
«Հանրային ձայն» կուսակցություն - ավելացել է 16 քվեաթերթիկ,
«Արդար Հայաստան» կուսակցություն-ավելացել է 5 քվեաթերթիկ,
«Հաղթանակ» կուսակցություն- ավելացել է 1 քվեաթերթիկ,
«Ուժը հայրենյաց» կուսակցություն- ավելացել է 6 քվեաթերթիկ,
«Հայաստանի եվրոպական կուսակցություն»-պակասել է 2 քվեաթերթիկ,
«Հանուն սոցիալական արդարության» կուսակցություն- ավելացել է 1 քվեաթերթիկ,
«Հանրապետություն» կուսակցություն- պակասել է 3 քվեաթերթիկ,
«Միացյալ Հայաստան» կուսակցություն-պակասել է 5 քվեաթերթիկ,
«Լուսավոր Հայաստան» կուսակցություն-ավելացել է 4 քվեաթերթիկ,
«Ժողովրդավարական Համախմբում» կուսակցություն- պակասել է 3 քվեաթերթիկ,
«Ապրելու երկիր» կուսակցություն-ավելացել է 4 քվեաթերթիկ,
Անվավեր քվեաթերթիկների թիվը պակասել է 266-ով։
Անճշտությունների չափը կազմել է 10։
Կենտրոնական ընտրական հանձնաժողովը սեպտեմբերի 24-ին կամփոփի Երևանի ավագանու ընտրությունների վերջնական արդյունքները։
Հիշեցնենք` Երևանում սեպտեմբերի 17–ին ավագանու ընտրություններ անցկացվեցին, որոնց մասնակցեցին 13 կուսակցություն և 1 դաշինք։ Քաղաքական ուժերից որևէ մեկին չհաջողվեց 50+ տոկոս քվե հավաքել, բայց նրանցից 5–ը, այնուամենայնիվ, հաղթահարեցին անցողիկ շեմը` «Հանրային ձայն» կուսակցություն (Արտակ Գալստյան), «Ազգային առաջընթաց» կուսակցության (Հայկ Մարության), «Հաղթանակ» կուսակցություն (Արտակ Զեյնալյան), «Քաղաքացիական պայմանագիր» կուսակցություն (Տիգրան Ավինյան) և «Մայր Հայաստան» դաշինք (Անդրանիկ Թևանյան)։
Սեպտեմբերի 18-ին Armlur.am-ը հայտնեց, որ «Քաղաքացիական պայմանագիր» կուսակցության վարչության նիստում քննարկվել է Կենտրոնական ընտրական հանձնաժողով դիմելու հարցը` մի քանի ընտրատեղամասում վերահաշվարկ իրականացնելու նպատակով։ Նրանք հույս ունեին, որ այդպես իրենց ուժի ձայները մի քանի հարյուրով կավելանան։