Հայտնի է` ովքեր են Արցախի կողմից բանակցում ադրբեջանական Եվլախում

ԵՐԵՎԱՆ, 21 սեպտեմբերի – Sputnik. Ադրբեջանական Եվլախ քաղաքում մեկնարկել է Արցախի և Ադրբեջանի ներկայացուցիչների հանդիպումը։

Արցախյան կողմից հանդիպմանը մասնակցում են Արցախի Հանրապետության Անվտանգության խորհրդի քարտուղարի տեղակալ Սերգեյ Մարտիրոսյանը և Արցախի Հանրապետության ԱԺ «Արցախի ժողովրդավարական կուսակցություն» խմբակցության ղեկավար Դավիթ Մելքումյանը։

Նրանք Եվլախ են ժամանել ռուս խաղաղապահների ուղեկցությամբ։

Ադրբեջանական կողմից բանակցում է Ադրբեջանի խորհրդարանի պատգամավոր Ռամին Մամեդովը։

Հիշեցնենք` Ադրբեջանը սեպտեմբերի 19–ին լայնամասշտաբ հարձակում է սկսել Արցախի դեմ։ Արցախի ՊՆ–ի հաղորդագրության համաձայն` ժամը 13։00–ի սահմաններում ադրբեջանական զինուժը շփման գծի ողջ երկայնքով խախտել է հրադադարը` հասցնելով հրթիռահրետանային հարվածներ։

Ադրբեջանի պաշտպանության նախարարությունը հայտարարել է, թե լոկալ բնույթի հակաահաբեկչական միջոցառումներ է անցկացնում։

Ադրբեջանական ագրեսիայի հետևանքով սեպտեմբերի 20-ի ժամը 21:30-ի դրությամբ կա առնվազն 200 զոհ և ավելի քան 400 վիրավոր։

Սեպտեմբերի 20–ին Արցախի Հանրապետության իշխանություններն ընդունել են ՌԴ խաղաղապահ առաքելության զորակազմի հրամանատարության՝ կրակի դադարեցման վերաբերյալ առաջարկությունը: