ԵՐԵՎԱՆ, 20 սեպտեմբերի – Sputnik. Ստեփանակերտի օդանավակայանը 1990-ականներից ի վեր չի շահագործվում։ X–ի իր միկրոբլոգում գրել է Արցախի մարդու իրավունքների պաշտպան Գեղամ Ստեփանյանը` անդրադառնալով այսօր տարածված լուսանկարին, որում Ստեփանակերտի օդանավակայանում հավաքված հարյուրավոր մարդիկ են։
«Ստեփանակերտի օդանավակայանից տարածված այս լուսանկարը միջազգային որոշ լրատվամիջոցների մոտ տպավորություն է ստեղծել, թե մարդիկ ինքնաթիռով են թռչում: Դա ճիշտ չէ, օդանավակայանը չի գործում 1990-ականներից, այժմ այն ծառայում է որպես ռուս խաղաղապահների շտաբ»,– գրել է Ստեփանյանը։
Հիշեցնենք` Ադրբեջանը սեպտեմբերի 19–ին լայնամասշտաբ հարձակում է սկսել Արցախի դեմ։ Արցախի ՊՆ–ի հաղորդագրության համաձայն` ժամը 13։00–ի սահմաններում ադրբեջանական զինուժը շփման գծի ողջ երկայնքով խախտել է հրադադարը` հասցնելով հրթիռահրետանային հարվածներ։
Ադրբեջանի պաշտպանության նախարարությունը հայտարարել է, թե լոկալ բնույթի հակաահաբեկչական միջոցառումներ է անցկացնում։
Ադրբեջանի կողմից իրականացված լայնածավալ ահաբեկչական հարձակման հետևանքով այս պահի դրությամբ Արցախում 32 զոհ կա, ավելի քան 200 վիրավոր։
Այսօր հայտնի դարձավ, որ Արցախի իշխանություններն ընդունել են ՌԴ խաղաղապահ առաքելության զորակազմի հրամանատարության՝ կրակի դադարեցման վերաբերյալ առաջարկությունը: