ԵՐԵՎԱՆ, 19 սեպտեմբերի – Sputnik. Նախաձեռնվել է ևս մեկ քրեական վարույթ՝ սոցցանցում հրապարակայնորեն բռնության կոչեր հնչեցնելու դեպքի առթիվ։ Տեղեկությունը հայտնում է ՀՀ քննչական կոմիտեի մամուլի ծառայությունը։
Նշվում է, որ կառավարության շենքի դիմաց բողոքի ակցիայի մասին օգտատեր Անի Կարապետյանը ֆեյսբուքյան իր էջում մի քանի գրառումներ է կատարվել, որոնք առերևույթ պարունակում են բնռնություն գործադրելու հրապարակային կոչեր։
Գրառումներից մեկում նա նշել է. «Պետք է վերցնել կառավարության շենքը և ևս մի քանի պետական նշանակություն ունեցող շենքեր, որից հետո իմանալ, սատկած Նիկոլը որտեղ է, գնալ, սատկացնել նրան…»։
Մեկ այլ գրառման մեջասված է. «Առավոտյան Երևանի գլխավոր փողոցները հարկավոր է կաթվածահար անել: Գիշերը պահեստավորեք մեքենաների անիվներ և դրանք վաղը կրակի տվեք կենտրոնական փողոցներում…»։
ՔԿ–ից հայտնում են, որ այս գրառումներում առերևույթ առկա են հանցագործության հատկանիշներ, ուստի նախաձեռնվել է քրեական վարույթ Բռնություն գործադրելու հրապարակային կոչերը, բռնությունը հրապարակայնորեն արդարացնելը կամ քարոզելը, ինչպես նաև այդ նպատակով նյութեր կամ առարկաներ տարածելը հոդվածով։
Իրականացվում է նախաքննություն։ Միջոցներ են ձեռնարկվում Անի Կարապետյանին ձերբակալելու ուղղությամբ։
Հավելենք, որ մինչ այս քննչական կոմիտեն արդեն հայտնել էր ևս երկու անձի նկատմամբ քրեական վարույթ նախաձեռնելու մասին։
Նշենք, որ Արցախի դեմ սանձազերծված ադրբեջանական նոր ագրեսիան քաղաքացիներին բերել է ՀՀ կառավարության շենքի մոտ։ Նրանք պատասխան են պահանջում ՀՀ իշխանություններից։