ԵՐԵՎԱՆ, 19 սեպտեմբերի – Sputnik. Արցախի ՊԲ մամուլի ծառայությունը հայտնում է, որ Ադրբեջանի ՊՆ կողմից տարածված հայտարարությունը, թե իբր ՊԲ ստորաբաժանումները սեպտեմբերի 18 -ին ժամը 23:50-ի սահմաններում կրակ են բացել Արցախի Հանրապետության Ասկերանի շրջանի օկուպացված տարածքներում տեղակայված ադրբեջանական դիրքերի ուղղությամբ, չի համապատասխանում իրականությանը։
Կարճ ժամանակ անց Ադրբեջանի ԱԱԾ–ն ապատեղեկատվություն տարածեց։ «Ադրբեջանի ԱԱԾ տարածած հաղորդագրությունն այն մասին, թե իբր ՊԲ ստորաբաժանումները կատարել են դիվերսիոն ներթափանցում և Ահմեդբեյլի֊Ֆիզուլի֊Շուշի ավտոճանապարհի 58֊րդ կմ. հատվածում իբրև թե տեղադրել հակատանկային ական, որի պայթյունի հետևանքով սեպտեմբերի 18֊ին` ժամը 03:45-ի սահմաններում մահացել է երկու քաղաքացիական անձ, հերթական ապատեղեկատվությունն է»,–ասված է ՊԲ տարածած 2–րդ հաղորդագրության մեջ։
Նշենք, որ այսօր Ադրբեջանին ՊՆ–ն արդեն հասցրել է կեղծ լուրեր տարածել նաև ՀՀ սահմանագոտու վերաբերյալ։ ՀՀ ՊՆ–ն ավելի ուշ հերքեց` ասելով, որ Ադրբեջանի պաշտպանության նախարարության հաղորդագրությունն այն մասին, թե սեպտեմբերի 19-ին` ժամը 02։40-ի սահմաններում, Հայաստանի Հանրապետության ԶՈւ ստորաբաժանումներն իբր կրակ են բացել սահմանագոտու արևելյան հատվածում տեղակայված ադրբեջանական դիրքերի ուղղությամբ, չի համապատասխանում իրականությանը։