ԵՐԵՎԱՆ, 18 սեպտեմբերի – Sputnik. Երևանի ավագանու ընտրությունները հեռու էին ազատ, արդար, թափանցիկ ու ժողովրդավար լինելուց։ Այս մասին հայտարարություն է տարածել «ՀայաՔվե» նախաձեռնությունը։
Նշվում է, որ մշտադիտարկող խմբերն արձանագրել են մի շարք ընտրախախտումներ։
«Զանգվածաբար գործադրվել է վարչական ռեսուրս՝ իշխանամետ քարոզչությանը ծառայեցնելով պաշտոնեական լիազորությունները, հանրային նյութական, ֆինանսական և տեղեկատվական ռեսուրսները»,– նշված է տարածած հայտարարության մեջ։
Ըստ «ՀայաՔվեի»` քվեարկության գործընթացն ուղեկցվել է հանձնաժողովների անդամների հանդեպ գործադրված ճնշումներով, մեծ թվով քաղաքացիների՝ տարբեր լծակների գործադրմամբ ընտրատեղամասեր բերելով, վստահված անձանց ու դիտորդների իրավունքների ոտնահարումներով և այլն։
Ընդգծվում է, որ արձանագրվել է նաև ընտրություններին աննախադեպ ցածր մասնակցություն։
«ՀայաՔվե» դիտորդական առաքելությունն առաջիկայում հանդես կգա համապարփակ զեկույցով։
Հանրությանը կներկայացվեն փաստեր ու վերլուծություն ընտրությունների ընթացքում իրականացված ապօրինությունների մասին։
Հիշեցնենք` Երևանում սեպտեմբերի 17–ին ավագանու ընտրություններ էին, որին մասնակցեց 13 կուսակցություն և 1 դաշինք։ Երևանի 12 վարչական շրջաններում գործել են 475 ընտրական տեղամասեր։
Ընտրություններին մասնակից ուժերի միջև ձայները բաշխվել են հետևյալ կերպ`
1.
«Հանրային ձայն» կուսակցություն– 22․431 (9.68%)2.
«Քաղաքացիական պայմանագիր» կուսակցություն– 75․463 (32.57%)3.
«Արդար Հայաստան» կուսակցություն– 2595 (1.12%)4.
«Հաղթանակ» կուսակցություն– 3959 (1.71%)5.
«Ուժը հայրենյաց» կուսակցություն– 1706 (0.74%)6.
«Հայաստանի եվրոպական կուսակցություն– 2572 (1.11%)7.
«Ազգային առաջընթաց» կուսակցություն– 43․765 (18․89%)8.
«Հանուն սոցիալական արդարության» կուսակցություն–780 (0.34%)9.
«Հանրապետություն» կուսակցություն– 26․236 (11.32%)10.
«Միացյալ Հայաստան» կուսակցություն–1282 (0.55%)11.
«Լուսավոր Հայաստան» կուսակցություն– 4174 (1.8%)12.
«Ժողովրդավարական Համախմբում» կուսակցություն– 2348 (1.01%)13.
«Ապրելու երկիր» կուսակցություն– 8425 (3.64%)14.
«Մայր Հայաստան» դաշինք– 35․739 (15.43%)։Ստացվում է, որ անցողիկ շեմը հաղթահարել է 5 քաղաքական ուժ` «Քաղաքացիական պայմանագիր» կուսակցությունը, «Ազգային առաջընթաց» կուսակցությունը, «Մայր Հայաստան» դաշինքը, «Հանրապետություն» կուսակցությունը և «Հանրային ձայն» կուսակցությունը։