ԵՐԵՎԱՆ, 17 սեպտեմբերի – Sputnik. ՀՀ նախագահ Վահագն Խաչատուրյանը չի կարծում, թե ՀՀ իշխանությունները լվացել են ձեռքերն Արցախից։ Այս մասին նա հայտարարեց լրագրողների հետ զրույցում` Երևանի ավագանու ընտրություններում քվեարկելուց հետո` անդրադառնալով հարցին, թե արդյոք Արցախի խնդրի հետ կապված ՀՀ իշխանությունների կողմից նահանջ կա, քանի որ վերջին շրջանում նրանք խոսում են միայն Ստեփանակերտ–Բաքու երկխոսության մասին։
«Չէ, կարծում եմ՝ ընդհակառակը, կա ճշմարտությունն ասելու և ճշմարտությունը լսելու պատրաստակամության խնդիր։ Մենք հասել ենք այն հանգրվանին, որ իրականում պետք է կարողանանք Լեռնային Ղարաբաղում ապրող մեր հայրենակիցների անվտանգությունն ապահովենք։ Որևէ մեկնաբանություն, որն ուղղված է նրան, որ իշխանությունը մոռացել է, դրանով չի զբաղվում, ընդհանրապես իրականության հետ կապ չունի»,- լրագրողների հետ զրույցում ասաց Խաչատուրյանը։
Նրա խոսքով՝ խաղաղության պայմանագրի առումով շատ բարդ բանակցային գործընթաց է, իրավիճակը նույնպես շատ բարդ է։ ՀՀ նախագահը շեշտեց` ձգտում կա հնարավորինս շուտ խաղաղության համաձայնագիրը ստորագրել, որպեսզի Հայաստանը հերթական անորոշ իրավիճակում չհայտնվի այն առումով, որ կարող է սահմանում զորքեր կուտակվեն, կարող է՝ չկուտակվեն։ Խաչատուրյանի պնդմամբ` պետք է ունենալ վստահելի մի միջավայր, որտեղ վաղվա հետ կապված, նաև սահմանների անձեռնմխելիության և ինքնիշխանության կորստի հետ կապված որևէ խնդիր չլինի։
Հարցին, արդյոք խաղաղության պայմանագրի գործընթացի մանրամասներն իրեն հայտնում են, նախագահը վստահեցրեց` իհարկե, անհոգ եղեք։
Հիշեցնենք, որ այսօր ՀՀ վարչապետ Նիկոլ Փաշինյանը հայտարարեց, որ Հայաստանն ամեն ինչ անում է, որպեսզի Ադրբեջանի հետ խաղաղության պայմանագիրը ստորագրվի մինչև տարեվերջ կամ մյուս տարվա սկիզբ։
Նա նաև հերթական անգամ հորդորեց Ստեփանակերտին և Բաքվին ուղիղ երկխոսություն ունենալ։