ԵՐԵՎԱՆ, 17 սեպտեմբերի – Sputnik. «Ապրելու երկիր» կուսակցության քաղաքապետի թեկնածու Մանե Թանդիլյանն այսօր քվեարկեց հանուն ինքնիշխանության, հետևաբար հանուն իշխանափոխության։ Քվեարկությունից հետո այդ մասին ճեպազրույցի ժամանակ ասաց նա։
«Սիրելի երևանցիներ, անպայման մասնակցեք ընտրությանը, այլապես դուք նպաստում եք իշխանության վերարտադրությանը։ Մենք տարբեր ընտրատեղամասերից ընտրախախտումների մասին ահազանգներ ստանում ենք, սակայն դեռ ոչ մի լուրջ խախտում չենք արձանագրել»,– նշեց Թանդիլյանը։
Նա ևս արձանագրեց, որ այսօրվա ընտրությանը բավականին ցածր մասնակցության ցուցանիշ է գրանցվել։ Թանդիլյանը դա պայմանավորեց այսօր ՀՀ–ում նշվող Խաչվերացով, երբ մարդիկ այցելում են գերեզմաններ։
«Ժողովուրդն է իշխանազրկելու ՔՊ–ին ընտրությունների միջոցով, և ցածր մասնակցությունը կարող է ինչ-որ կերպ վնասել այդ գործընթացին»,– ընդգծեց նա։
Հիշեցնենք` Երևանում այսօր ավագանու ընտրություններ են անցկացվում, որին մասնակցում են 13 կուսակցություն և 1 դաշինք.
1.
«Հայաստանի եվրոպական» կուսակցություն (թեկնածուն` Տիգրան Խզմալյան),2.
«Ժողովրդավարական համախմբում» կուսակցություն (Սուրեն Պետրոսյան),3.
«Քաղաքացիական պայմանագիր» կուսակցություն (Տիգրան Ավինյան),4.
«Հանուն սոցիալական արդարության» կուսակցություն (Արման Ղուկասյան),5.
«Ուժը հայրենյաց» կուսակցություն (Նելլի Հարությունյան),6.
«Հանրային ձայն» կուսակցություն (Արտակ Գալստյան),7.
«Ազգային առաջընթաց» կուսակցություն (Հայկ Մարության),8.
«Հաղթանակ» կուսակցություն (Վիկտոր Մնացականյան),9.
«Ապրելու երկիր» կուսակցություն (Մանե Թանդիլյան),10.
«Հանրապետություն» կուսակցություն (Արտակ Զեյնալյան),11.
«Միացյալ Հայաստան» կուսակցություն (Երվանդ Թարվերդյան),12.
«Արդար Հայաստան» կուսակցություն (Նորիկ Նորիկյան),13.
«Լուսավոր Հայաստան» կուսակցություն (Դավիթ Խաժակյան),14.
«Մայր Հայաստան» դաշինք («Երկիր Ծիրանի» և «Ինտելեկտուալ Հայաստան կուսակցություններ) (Անդրանիկ Թևանյան)։