ԵՐԵՎԱՆ, 16 սեպտեմբերի – Sputnik, Խաչիկ Չախոյան. Սերբիայի մայրաքաղաք Բելգրադում մեկնարկած ազատ ոճի ըմբշամարտի աշխարհի առաջնությունում այսօր Հայաստանի հավաքականի մարզիկ Արման Անդրեասյանը կիսաեզրափակիչ գոտեմարտում պարտվեց աշխարհի 2022 թվականի արծաթե մեդալակիր ամերիկացի Զեյն Ռետերֆորդին։ Վաղը մեր ըմբիշը կգոտեմարտի բրոնզե մեդալի համար։
Նշենք, որ ազատ ոճի ըմբշամարտի աշխարհի առաջնությունում այսօր Հայաստանի հավաքականից պայքարի են դուրս եկել երկու ըմբիշներ։
61 կգ քաշային կարգում Նորիկ Հարությունյանը մեկնարկային գոտեմարտում 0։5 հաշվով պարտվել է բելառուս Անդրեյ Բեկրենևին։
Իսկ ահա մեր երկրորդ ըմբիշը` Արման Անդրեասյանը, որը գոտեմարտում է 70կգ քաշային կարգում, մինչ այս երեք գոտեմարտ էր անցկացրել ու տոնել նույնքան հաղթանակ։ Նա առավելության է հասել չինացի Նան Չաոյի նկատմամբ` 4։1 հաշվով, ապա Հյուսիսային Մակեդոնիայի ներկայացուցիչ Ֆաթի Վեյսելի նկատմամբ՝ 5։2, և, վերջապես, քառորդ եզրափակիչում Անդրեասյանը պարտության է մատնել ճապոնացի Յոշինոսուկե Աոյագիին 5։3 հաշվով։
Վաղը Հայաստանի հավաքականի կազմում գորգ դուրս կգան Արսեն Հարությունյանը, Հրայր Ալիխանյանն ու Արման Ավագյանը։
Օլիմպիական քաշային կարգ են համարվում Արսեն Հարությունյանի (57կգ) և Հրայր Ալիխանյանի(74կգ) քաշային կարգերը։ Յուրաքանչյուր օլիմպիական քաշային կարգում խաղարկվելու է 5 ուղեգիր:
Ուղեգիր կնվաճեն յուրաքանչյուր քաշային կարգում 4 մեդալակիրները, ինչպես նաև բրոնզե մեդալի համար գոտեմարտում պարտված 2 ըմբիշների միջև լրացուցիչ գոտեմարտի հաղթողը: