Իգոր Նիկոլաևը պլանային զննում է անցնում հիվանդանոցում. ԶԼՄ

ԵՐԵՎԱՆ, 15 սեպտեմբերի – Sputnik. Հայտնի երգիչ և կոմպոզիտոր, ՌԴ ժողովրդական արտիստ Իգոր Նիկոլաևը հիվանդանոցում է գտնվում պլանային բուժզննման նպատակով, մտահոգվելու առիթ չկա։ Այս մասին ՏԱՍՍ–ին հայտնել է երաժշտի մտերիմներից մեկը։

Ավելի վաղ մի շարք Telegram–ալիքներ տեղեկություն էին տարածել, որ Նիկոլաևը գտնվում է վերակենդանացման բաժանմունքում սրտամկանի ինֆարկտի ախտանշաններով, նրա վիճակը ծանր է, բժիշկները արտակարգ խորհրդակցություն են անցկացրել` որոշելու համար` արդյոք կարելի է վիրահատություն անցկացնել։

Կոմպոզիտորի մոտ սրտի հետ կապված խնդիրներ էին առաջացել դեռ տարեսկզբին. ԶԼՄ-ները ինֆարկտի կասկածանքով հոսպիտալացնելու մասին հայտնել էին հունվարի 31-ին: Այնուհետև Նիկոլաևին շտապ տեղափոխել էին հիվանդանոց և վիրահատել։

Դրանից հետո Նիկոլաևը հայտարարել էր, որ իրեն լավ է զգում և ծայրահեղ ծանր վիճակի մասին տեղեկությունը փոքր-ինչ չափազանցված է եղել:

Իգոր Նիկոլաևը ծնվել է 1960 թվականի հունվարի 17-ին Խոլմսկում (Սախալինի մարզ)։ Երգեր է գրել Ալլա Պուգաչովայի («Айсберг», «Расскажите, птицы»), Իրինա Ալեգրովայի («Суженый мой», «Не улетай, любовь», «Странник», «Младший лейтенант»), Նատաշա Կորոլյովայի («Желтые тюльпаны», «Подсолнухи», «Маленькая страна») համար։ 1986 թվականից հանդես է գալիս որպես մեներգիչ։