ԵՐԵՎԱՆ, 15 սեպտեմբերի –. Sputnik. Հայաստանի ղեկավարության հայտարարությունները չեն արտացոլում Ռուսաստանի վերաբերյալ հայ ժողովրդի մտքերն ու զգացմունքները, դրանք ցույց չեն տալիս երկրների միջև հարաբերությունների ավանդաբար ձևավորված մակարդակը։ ՌԻԱ Նովոստիին այս մասինն ասել է ռուս սենատոր Ալեքսանդր Բաշկինը:
Ավելի վաղ Հայաստանի վարչապետ Նիկոլ Փաշինյանը հայտարարել էր, որ ռուս խաղաղապահները չեն կատարել իրենց խնդիրը Լեռնային Ղարաբաղում։
«Հայաստանի ղեկավարության գործողություններն ու խոսքերը հայ ժողովրդի և ռուս ժողովրդի հարաբերությունների էությունը արտահայտումը չեն։ Դա չի արտացոլում Հայաստանի և Ռուսաստանի միջև հարաբերությունների իրական և ավանդաբար ձևավորված մակարդակը, ուստի պետք է տարանջատել այն, ինչ հայտարարում են առանձին քաղաքական գործիչներ, թեկուզև շատ բարձր մակարդակի, և այն, ինչ մտածում են հասարակ քաղաքացիները», - ասել է Բաշկինը։
Սենատորը նշել է, որ այդ հայտարարություններից մի քանիսը երկու պետությունների միջև հարաբերությունները բարդացնելու փորձ են: Սակայն դրանից, նրա խոսքով, ոչինչ չի ստացվի։
«Ե՛վ ռուս ժողովուրդը, և՛ հայ ժողովուրդը գնահատում և փայփայում են մեր պետությունների միջև հարաբերությունները. թույլ չեն տա, որ դրանք փլուզվեն, որքան էլ դա ցանկանում են Արևմուտքում», - եզրափակել է խորհրդարանականը:
Հիշեցնենք` սեպտեմբերի 8–ին Ռուսաստանում Հայաստանի Հանրապետության դեսպան Վաղարշակ Հարությունյանը կանչվել էր ՌԴ ԱԳՆ։ ՌԴ-ն իր կոշտ դիրքորոշումն ու բողոքի նոտան էր հայտնել Հայաստանին։
Հայտարարության մեջ ասվում էր, որ Հայաստանի ղեկավարությունը վերջին օրերին մի շարք ոչ բարեկամական քայլեր է ձեռնարկել ՌԴ-ի նկատմամբ։
Առաջինը միջազգային քրեական դատարանի Հռոմի կանոնադրության (Հռոմի ստատուտ) վավերացման գործընթացի մեկնարկն է, երկրորդը` ՀՀ վարչապետի կնոջ` Աննա Հակոբյանի այցը Կիև, ինչպես նաև մարդասիրական օգնության փոխանցումը Կիևին, և երրորդը` ՀՀ տարածքում ԱՄՆ-ի մասնակցությամբ զորավարժությունների անցկացումը։