ԵՐԵՎԱՆ, 13 սեպտեմբերի – Sputnik. ՀՀ–ում հեղափոխություն կարող է անել միայն ՀՀ ժողովուրդը, և ժողովուրդն այդ հեղափոխությունն արդեն արել է։ ՀՀ ԱԺ–ում կառավարության հետ հարցուպատասխանի ժամանակ հայտարարեց ՀՀ վարչապետ Նիկոլ Փաշինյանը։
Նշենք, որ անցյալ շաբաթ Հայաստանում լուրեր տարածվեցին, թե երկրում վագներական 3000 մարտիկ կա, որոնք, իբր, տեղի ուժերի աջակցությամբ պետք է հեղաշրջում իրականացնեն և հեռացնեն վարչապետ Նիկոլ Փաշինյանին։
Նիկոլ Փաշինյանն ասաց, որ ամեն դեպքում ՀՀ իրավապահ մարմինները պարտավոր են արձագանքել մամուլում հայտնված տեղեկություններին, դա իրենց իրավասության սահմաններում է։
«Որքան ինձ հայտնի է, վագներականների մասին հրապարակում է հայտնվել տելեգրամյան ալիքներում։ ԱԱԾ իրավասության սահմաններում է ստուգել հրապարակված տեղեկատվությունը»,– նշեց վարչապետը։
Հավելենք, որ ՌԴ Դաշնային խորհրդի միջազգային կոմիտեի ղեկավար Գրիգորի Կարասինը վագներականների մասին լուրերը զառանցանք էր անվանել, իսկ ՌԴ ԱԳՆ պաշտոնական ներկայացուցիչ Մարիա Զախարովան` հերթական առասպել։