ԵՐԵՎԱՆ, 13 սեպտեմբերի–Sputnik. Էլեկտրամոբիլներին տրված արտոնությունների ժամկետը ևս մեկ տարով կերկարաձգվի։ Այսօր Ազգային ժողովում կառավարության հետ հարցուպատասխանի ժամանակ այս մասին տեղեկացրեց փոխվարչապետ Մհեր Գրիգորյանը։ Խոսքը վերաբերում է ներկրման և օտարման համար ավելացված արժեքի հարկից ազատմանը։
«Սակայն սա, ամենայն հավանականությամբ, կլինի վերջին մեխանիկական երկարաձգումը»– ասաց Գրիգորյանը։
Նրա խոսքով՝ ապագայում իշխանություններն ավելի հստակ կարգավորումներ կմշակեն էլեկտրամոբիլների վերաբերյալ. կսահմանվի շահառուների նույնականացում, արտոնություններ և ներմուծվող էլեկտրամոբիլի տեսակը (հիբրիդային կամ ոչ հիբրիդային) և այլն:
«Իհարկե, շատ լավ է, որ հոսք ունենք և ներմուծումների դինամիկան շատ լավ է։ Բայց ֆիքսենք, որ էլեկտրամոբիլների ուտիլիզացիոն ռեժիմը լրիվ այլ է, շատ ավելի թանկ է, շատ ավելի լրացուցիչ անելիքներ է ենթադրում։ Կարծում եմ` մեր հետագա կարգավորումները նաև այդ հարցի պատասխանները պետք է տան և դրանք հասցեագրեն»,– նշեց փոխվարչապետը։
Հիշեցնենք, որ էլեկտրական մեքենաների ներմուծման համար ԱԱՀ վճարումից ազատելու հարկային արտոնությունը սահմանվել էր 2019 թվականին: Զուգահեռաբար, ԵՏՀ խորհուրդը 2020 թվականի մարտին որոշում է ընդունել մինչև 2021 թվականի ավարտը երրորդ երկրներից ԵԱՏՄ ներմուծվող էլեկտրամոբիլների մաքսատուրքը վերացնելու մասին։
2021 թվականի դեկտեմբերի վերջին որոշում է կայացվել էլեկտրական մեքենաների ԱԱՀ-ից ազատման արտոնությունը մինչև 2024 թվականի հունվարի 1-ը երկարաձգելու մասին։