ԵՐԵՎԱՆ, 13 սեպտեմբերի – Sputnik. Սիրիայի դեմ կիրառված արևմտյան տնտեսական պատժամիջոցներն իրենց հետքն են թողել բնակչության մեծ մասի, հատկապես աղքատների վրա, ոչ թե վերնախավի։ Այս մասին ճեպազրույցի ժամանակ Ժնևում հայտարարել է Սիրիայում իրավիճակի հետաքննության ՄԱԿ–ի անկախ միջազգային հանձնաժողովի անդամ Հաննի Մեգալլին։
«Արևմուտքի երկրների կառավարությունները պետք է գնահատեն Սիրիայի հասարակ բնակչության համար պատժամիջոցների հետևանքները, քանի որ էլիտաները լավ պաշտպանված են։ Սա է Հարավի երկրներում կիրառած պատժամիջոցների խնդիրը։ Այդ երկրների էլիտայի վրա պատժամիջոցները որևէ կերպ չեն ազդում։ Տնտեսական պատժամիջոցներն անդրադառնում են բնակչության մեծ մասի, հատկապես աղքատների վրա։ Սա այնքան պարզ է, որ հետաքննություն անցկացնելու կարիք չկա դա ապացուցելու համար», – ասել է նա։
Սիրիայում մարդու իրավունքների ոտնահարման հետաքննության հարցերով սիրիական հանձնաժողովի` ՄԱԿ–ին ներկայացրած զեկույցում ասվում էր, որ Արևմուտքը պետք է կանոնավոր կերպով ուսումնասիրի միակողմանի պատժամիջոցների հետևանքները Սիրիայի բնակչության համար, մարդասիրական հարցերը չպետք է քաղաքականացվեն։
ԵՄ–ն և ԱՄՆ–ն փետրվարի վերջին չեղարկել են մարդասիրական կազմակերպությունների պատժամիջոցային ցանկերում գտնվող անձանց և կազմակերպություններին փոխանցումներ կատարելու կամ ապրանքների ու ծառայությունների տրամադրման համար ԵՄ անդամ պետությունների համապատասխան մարմիններից նախնական թույլտվություն հայցելու անհրաժեշտությունը։ Այս բացառությունները երկարաձգել են մինչև 2024 թվականի մարտի 11-ը։