ԵՐԵՎԱՆ, 12 սեպտեմբերի – Sputnik. ՆԱՏՕ-ն ակտիվորեն փորձում է իր մեջ ինտեգրել Հարավային Կովկասի երկրները, հատկապես հետաքրքիր են Վրաստանն ու Ադրբեջանը։ Ռազմավարական հետազոտությունների և նախաձեռնությունների վերլուծականկենտրոնի կողմից կազմակերպված կլոր սեղանի ժամանակ այս մասին հայտարարել է Ե.Մ. Պրիմակովի անվան համաշխարհային տնտեսության և միջազգային հարաբերությունների ինստիտուտի տնօրենի պաշտոնակատար Ֆյոդոր Վոյտոլովսկին։
Փորձագետն ուշադրություն է հրավիրել այն հանգամանքին, թե որքան խորն է Ադրբեջանի ռազմատեխնիկական համագործակցությունը Թուրքիայի հետ, որն ԱՄՆ-ից հետո երկրորդ բանակն ունի ՆԱՏՕ-ում, և, ի հեճուկս առանձին դրվագների, մնում է ԱՄՆ-ի հավատարիմ ռազմաքաղաքական դաշնակիցը:
Վոյտոլովսկու խոսքով՝ պահպանելով հավատարմությունը ԱՄՆ-ին` Թուրքիան լիարժեք քարտ-բլանշ ունի Ադրբեջանի հետ հնարավորինս սերտ համագործակցության համար` Ադրբեջանին, անշուշտ, հեռանկարում դաշինքի կազմում տեսնելու նպատակով: Սակայն դեպի ՆԱՏՕ Ադրբեջանի ճանապարհին շատ լուրջ խոչընդոտ կա՝ Լեռնային Ղարաբաղը, և, ընդհանուր առմամբ, Հայաստանի հետ տարածքային վեճերը։
«Որպեսզի Թուրքիան և Ադրբեջանը կարողանան ապահովել Ադրբեջանի եվրաատլանտյան ինտեգրումը, Ադրբեջանը պետք է լուծի տարածքային վեճերը Հայաստանի հետ։ Եթե այդ վեճերը լուծվեն հօգուտ Ադրբեջանի, ապա դա հնարավորություն կընձեռի ՆԱՏՕ-ին այդ երկրի ավելի խորը ինտեգրման համար», - ավելացրել է Վոյտոլովսկին։
Նա միաժամանակ կարծում է, որ Ադրբեջանի եվրատլանտյան հեռանկարներին շատ մեծ ոգևորությամբ է վերաբերվում ԱՄՆ Հանրապետական կուսակցությունը, որը միշտ ավելի պրագմատիկ է եղել։ Դեմոկրատներն այստեղ ավելի ճկուն դիրքորոշում ունեն, բայց դեմոկրատները, ի վերջո, նույնպես պատրաստ են աչք փակել Ադրբեջանի գործողությունների վրա։
Քաղաքագետը վստահ է, որ ընդհանուր առմամբ վաշինգտոնյան ստրատեգներին չի հետաքրքրում Հայաստանի ճակատագիրը, ամերիկացիների տեսանկյունից Հայաստանի տեղը Թուրքիայի ենթակայության տակ է, թեև երկարաժամկետ հեռանկարում Հայաստանի անդամակցությունը ՆԱՏՕ-ին նույնպես արդիական է մնում Արևմուտքի համար: Անշուշտ, «կրճատած» տարածքներով և թուրքական «կուրատորության» տակ։