ԵՐԵՎԱՆ, 12 սեպտեմբերի – Sputnik. Հայաստանի մինչև 21 տարեկան ֆուտբոլիստների հավաքականը Եվրոպայի 2025 թվականի առաջնության ընտրական խաղում սեփական հարկի տակ 0։1 հաշվով պարտվեց Չեռնոգորիայի հավաքականին։
Հայաստանի երիտասարդական հավաքականը հոգեբանորեն այդքան էլ լավ վիճակում չէր, քանի որ գլխավոր մարզիչ Ռաֆայել Նազարյանը հրաժարական էր տվել Ալբանիային պարտվելուց հետո։ Միայն խաղից առաջ էր պարզ դարձել, որ այդ պարտականությունները կատարելու է Նազարյանի օգնականը` Տիգրան Ղազարյանը։
Հայաստանի հավաքականը խաղի ընթացքում ավելի մոտ էր հաջողությանը, ավելի շատ էր տիրում գնդակին։ Գևորգ Տարախչյանը 3 անգամ միջին տարածությունից կարող է հաջողություն գրանցել, սակայն հարվածներն այդքան էլ արդյունավետ չէին ստացվում։
Եվ ահա հանդիպման 84-րդ րոպեին հյուրերին հաջողվեց հակագրող անցկացնել ու թիմին առաջ մղել։ Գոլի հեղինակը Բալշա Տոշկովիչն էր։
Այսպիսով Հայաստանի Մ21 հավաքականը կրեց 2-րդ անընդմեջ պարտությունը, երկուսն էլ` սեփական հարկի տակ։
Ընտրական հաջորդ հանդիպումը մեր երիտասարդական հավաքականը կանցկացնի հոկտեմբերի 13-ին։ Այդ օրը հայաստանյան թիմը հակառակորդի հարկի տակ կմրցի Ռումինիայի իր հասակակիցների հետ։