ԵՐԵՎԱՆ, 11 սեպտեմբերի–Sputnik. Ազգային ժողովի պատգամավորի և ՀՀ մարդու իրավունքների պաշտպանի նկատմամբ քրեական հետապնդում հարուցելուն կամ նրան ազատությունից զրկելուն համաձայնություն տալու միջնորդագիրը ԱԺ–ում կարող է քննարկվել կա՛մ առաջիկա հերթական նիստում, կա՛մ ԱԺ արտահերթ նստաշրջանում, կա՛մ արտահերթ նիստում։ ԱԺ կանոնակարգ սահմանադրական օրենքի այսպիսի փոփոխություն են առաջարկում «Քաղաքացիական պայմանագիր» խմբակցության պատգամավորներ Հասմիկ Հակոբյանն ու Արփի Դավոյանը։
Գործող օրենքով գլխավոր դատախազը պատգամավորի և մարդու իրավունքների պաշտպանի նկատմամբ քրեական հետապնդում հարուցելուն կամ ազատությունից զրկելուն համաձայնություն տալու միջնորդագիրը կարող է ներկայացնել միայն Ազգային ժողովի առաջիկա նիստերում։ Ըստ պատգամավորների` այս կարգավորումներով միջնորդագրի քննարկումն անտեղի ձգձգվում է։
«Եթե, օրինակ, դեպքը տեղի ունենա գարնանային նստաշրջանի վերջում, այսինքն` հունիս ամսին, իրավապահ մարմինները հնարավորություն չեն ունենա սահմանված ժամկետներում կատարել իրենց պարտականությունները, քանի որ միջնորդագիրն ԱԺ–ն կկարողանա քննարկել միայն սեպտեմբերին, այսինքն` 3 ամիս անց»,– օրենքի առաջարկվող փոփոխությունների հիմնավորումը ներկայացրեց պատգամավոր Հասմիկ Հակոբյանը։
«Հայաստան» խմբակցության պատգամավոր Գեղամ Նազարյանը նշեց` սա նախագիծ է ոչ մի բանի մասին։ Ըստ նրա, եթե, օրինակ, գլխավոր դատախազը ցանկանա ՔՊ–ից որևէ մեկին անձեռնմխելիությունից զրկելու հարցը քննարկել, խմբակցության պատգամավորներն ի աջակցություն իրենց գործընկերոջ նիստին չեն գա, ու այդպիսով նիստը չի կայանա։
«Եթե դա լինի «Հայաստան» խմբակցության Y պատգամավորի նկատմամբ, կգան, և անհավասար պայմաններ է ստեղծվում արտահերթ նիստ գումարելու համար։ Չե՞ք կարծում, որ հենց միայն նման անհավասար պայմաններ ստեղծելու պատճառով այս փոփոխությունը կարելի է չընդունել»,– նկատեց Նազարյանը։
Դրան ի պատասխան Հասմիկ Հակոբյանը վստահեցրեց` եթե իրենց խմբակցությունից որևէ պատգամավորի նկատմամբ քրեական հետապնդում հարուցելու և անձեռնմխելիությունից զրկելու հարց լինի, ապա խմբակցության պատգամավորներն ու հենց ինքը` տվյալ պատգամավորը,առիթը բաց չի թողնի պարզաբանումներ ներկայացնելու և արդարանալու հնարավորության համար։