ԵՐԵՎԱՆ, 11 սեպտեմբերի – Sputnik. Վերջին տարիներին հանրապետությունում նվիրատվության գործարքների շեշտակի աճ է արձանագրվել, ինչը ռիսկեր ունի, թե այդ ճանապարհով փորձում են ապօրինի ծագման գույքն օրինականացնել։ Կառավարությունն Ազգային ժողովին առաջարկում է փոփոխություն և լրացում կատարել «Փողերի լվացման և ահաբեկչության ֆինանսավորման դեմ պայքարի մասին» ՀՀ օրենքում։ Առաջարկվող փոփոխության նպատակն է ՀՀ–ում նոտարների և Կադաստրի կոմիտեի համար պարտականություն սահմանել` Կենտրոնական բանկին հաշվետվություններ ներկայացնել նվիրատվությունների մասով։
Արդարադատության նախարարի տեղակալ Արա Մկրտչյանը ներկայացրեց վերջին 3 տարիների տվյալները։ 2020թ. գրանցվել է Երևանում նվիրատվության 4017, մարզերում` 8674 գործարք, արդեն 2021թ. Երևանում 5882, մարզերում` 12060 գործարք, իսկ 2022թ.` Երևանում` 7334, մարզերում 15765 գործարք։
«Նվիրատվության գործարքների անընդհատական աճն իր մեջ պարունակում է հիմնավոր ռիսկեր առ այն, որ դրանց մեջ կարող են լինել այնպիսի գործարքներ, որոնք նպատակ ունեն թաքցնելու ապօրինի ճանապարհով ձեռք բերած գույքն ու, այսպես ասած, օրինականացնելու այն»,– նշեց Մկրտչյանը։
Նրա խոսքով` Կենտրոնական բանկի տրամադրության տակ եղած տվյալները հնարավորություն կտան գնահատելու ռիսկերը, ինչպես նաև առանձին դեպքերում կանխելու կամ բացահայտելու ապօրինի գույքի վերաբերյալ կատարված առանձին գործարքները։ Փոխնախարարի կարծիքով` սա ռիսկերը կառավարելու և գնահատելու հնարավորություն է, ինչն իր դրական ազդեցությունը կունենա փողերի լվացման և ահաբեկչության ֆինանսավորման դեմ պայքարի արդյունավետության ապահովման տեսանկյունից։