ԵՐԵՎԱՆ, 11 սեպտեմբերի – Sputnik. Հայաստանի և Չինաստանի գիտությունների ակադեմիաները Երևանում համագործակցության հուշագիր են ստորագրել։ Չինաստանի պատվիրակությունն առաջիկա օրերին Հայաստանի գիտական ինստիտուտներ կայցելի կոնկրետ նախագծերի համար պայմանավորվելու համար։
Ավելի վաղ երկու երկրների գիտական ինստիտուտները համագործակցում էին ապակենտրոնացած հենքով` հնարավորության դեպքում միմյանց հետ համատեղ նախագծեր սկսելով։ Հուշագիրը կհամակարգի այդ ջանքերը։ Ինչպես նշել է Չինաստանի գիտությունների ակադեմիայի փոխնախագահը, ակադեմիայի ինստիտուտներում և գիտական կենտրոններում շուրջ 60 հազար ասպիրանտ է սովորում, գործում են նաև փոխանակման ծրագրեր արտասահմանյան երկրների հետ։
Նա նշել է, որ Չինաստանն ուրախ է գիտության տարբեր ոլորտների ասպիրանտներ ընդունել նաև Հայաստանից։
Որպես համագործակցության հաջող օրինակ, Հայաստանի գիտությունների ակադեմիայի բնական գիտությունների բաժնի ակադեմիկոս-քարտուղար Ռուբեն Հարությունյանը նշել է խաղողի տարբեր տեսակների գենոմի կազմման միջազգային նախագիծը։
Նախագծի վրա աշխատել են գիտնականներ Չինաստանից, Հայաստանից, Ֆրանսիայից և այլ երկրներից, իսկ դրա արդյունքները հրապարակվել են միջազգային ամենահեղինակավոր գիտական ամսագրերից մեկում` Science–ում, այս տարվա մարտին։ Այդ աշխատանքի արդյունքները թույլ են տվել պարզել, որ Հայաստանում խաղողագործությունը ոչ թե 8 հազար տարվա պատմություն ունի, ինչպես ենթադրվում էր մինչ օրս, այլ 11-ից ավելի։ Առաջիկա օրերին Չինաստանի պատվիրակությունը Հայաստանի գիտական ինստիտուտներ կայցելի` պայմանավորվելու կոնկրետ նախագծերի մասին։