ԵՐԵՎԱՆ, 11 սեպտեմբերի – Sputnik. 2023 թվականի վերջին ԱՊՀ–ում կստեղծվի կամավորական շարժումը զարգացնելուն ուղղված հիմնական կազմակերպություն։ Այս մասին Telegram-ի իր ալիքում հայտնել է Պետդումայի երիտասարդական քաղաքականության հարցերի հանձնաժողովի նախագահ Արտյոմ Մետելևը։
«ԱՊՀ–ում կամավորական շարժումը զարգացնելուն ուղղված հիմնական կազմակերպություն կստեղծվի։ Այն միացյալ կառույց կլինի, որը հիմնադրել են Կամավորական կենտրոնների ասոցիացիան և Բելառուսի հանրապետական կամավորական կենտրոնը», – գրել է Մետելևը։
Նա հավելել է, որ նման կամավորական կազմակերպություն ստեղծելու որոշում է կայացրել Բիշքեկում ԱՊՀ երիտասարդության հարցերով խորհուրդը։ Այս կառույցը կօգնի ամբողջ տարածաշրջանին զարգանալ մեկ ուղղությամբ, բարձրացնել կիրառվող ծրագրերի որակն ու կավելացնի համատեղ նախագծերի քանակը։
Հարցի վերաբերյալ վերջնական որոշում կկայացնի կառավարությունների ղեկավարների խորհուրդը։
Մետելևը հայտնել է նաև, որ աշնանը ԱՊՀ երիտասարդական կազմակերպությունների ներկայացուցիչների հետ հանդիպում կանցկացվի, որի ժամանակ կքննարկվի Համագործակցության տարածքում Կամավորական շարժման տարի-2024–ի անցկացումը։