ԵՐԵՎԱՆ, 11 սեպտեմբեր - Sputnik. Սաուդյան Արաբիայի մայրաքաղաքում ընթացող ծանրամարտի աշխարհի առաջնությունում Անդրանիկ Կարապետյանը 89 կգ քաշային կարգում 175 կգ արդյունքով փոքր ոսկե մեդալ նվաճեց, բայց երկամարտի 377 կգ արդյունքով զբաղեցրեց 4-րդ տեղը։
Անդրանիկ Կարապետյանը սկսեց իր ելույթը, երբ մրցակիցներից ոմանք արդեն ավարտել էին պոկում վարժությունում իրենց ելույթը, իսկ ոմանք էլ առնվազն մեկ մոտեցում կատարել էին։ Բայց առաջին մոտեցումն Անդրանիկը ձախողեց և միայն երկրորդ մոտեցման ժամանակ գլխավերևում պահեց 170 կգ։ Իսկ երրորդ մոտեցման ժամանակ Կարապետյանը գլխավերևում ֆիքսեց 175 կգ կշռող ծանրաձողը։ Եվ դա բավական էր, որպեսզի հայ ծանրորդը այս վարժությունում նվաճի աշխարհի չեմպիոնի կոչումը։
Հրում վարժությունը Անդրանիկը սկսեց 192 կգ կշռող ծանրաձողին մոտեցումով ու, բարձրացնելով քաշը, ապահովեց արդյունք երկամարտում։ Երկրորդ մոտեցումն էլ հրումում Կարապետյանը իրացրեց` ֆիքսելով 20 2կգ և բարելավելով երկամարտի իր արդյունքը՝ 377 կգ։ Երրորդ մոտեցումը հայ ծանրորդի համար անհաջող էր։ Բարձրացնել 207 կգ Կարապետյանը չկարողացավ, ու մնում էր սպասել ու հասկանալ, թե ինչ արդյունք կունենան մրցակիցները, որոնք հրում վարժությունում բավականին բարձր կիլոգրամներ էին պատվիրել։ Ի վերջո պարզ դարձավ, որ հայ ծանրորդի երկամարտի 377 կգ արդյունքը չորրորդն է աշխարհի առաջնությունում։
Հայ ծանրորդների մասնակցությամբ հաջորդ մրցումը կայանալում է սեպտեմբերի 13-ին։ Այդ օրը աշխարհի առաջնության մեդալների համար պայքարի մեջ են մտնելու մեր հավաքականի երկու ծանրամարտիկներ՝ Դավիթ Հովհաննիսյանն ու Հակոբ Մկրտչյանը։