ՀՀ-ում անցկացված Էմմիյանի անվան մրցաշարի առաջատարը Ուզբեկստանն է

ԵՐԵՎԱՆ, 10 սեպտեմբերի – Sputnik. ՀՀ-ում՝ Արտաշատի մարզադաշտում, անցկացվել է ՀՀ ատլետիկայի ֆեդերացիայի նախագահ Ռոբերտ Էմմիյանի անվան գավաթի միջազգային 15-րդ մրցաշարը, որտեղ հայ հեռացատկորդները հայտնվել են տասնյակում։ Տեղեկությունը հայտնում է ՀՀ կրթության, գիտության, մշակույթի և սպորտի նախարարության մամուլի ծառայությունը։

Մրցաշարին հետևել են ՀՀ ԿԳՄՍ նախարար Ժաննա Անդրեասյանը, նրա տեղակալ Կարեն Գիլոյանը, Արտաշատ համայնքի ղեկավար Կառլեն Մկրտչյանը, Էմմիյանի անձնական մարզիչ, Հայաստանի վաստակավոր մարզիչ Մկրտիչ Կարապետյանը, բռնցքամարտիկ Վիկ Դարչինյանը և այլք։

«Ռոբերտ Էմմիյանի գավաթ» մրցաշարին այս տարի մասնակցել է 11 հեռացատկորդ Հայաստանից, Բուլղարիայից, Հունաստանից, Ղազախստանից, Ֆրանսիայից և Ուզբեկստանից:

«Հաղթողի կոչմանն 8.07 մետր արդյունքով արժանացել է Ուզբեկստանի ներկայացուցիչ Անվարով Անվարը: 2-րդ տեղը զբաղեցրել է ֆրանսիացի Յանն Տանտելի Դանիելը (7.56 մ), իսկ լավագույն եռյակը 7.48 մետր արդյունքով եզրափակել է հույն Անտոնիոս Ստիլիանիդիսը: Հայ հեռացատկորդները եղել են 3-ը և բոլորն էլ հայտնվել տասնյակում՝ Հրաչյա Մինասյանը զբաղեցրել է 6-րդ տեղը (6.93 մ), Գոռ Հովակիմյան՝ 7-րդ (6.85 մ), Արամայիս Սարգսյանը՝ 9-րդ (6.66 մ)»,- ասված է հաղորդագրությունում։