ԵՐԵՎԱՆ, 10 սեպտեմբերի - Sputnik. Ամենայն հայոց կաթողիկոս Գարեգին Երկրորդը շնորհավորել է Սամվել Շահրամանյանին Արցախի նախագահի պաշտոնում ընտրվելու կապակցությամբ։ Այս մասին հայտնում են Արցախի տեղեկատվական շտաբից։
«Մայր Աթոռ Սուրբ Էջմիածնից Մեր ողջույնն ու Հայրապետական օրհնությունն ենք բերում Ձեզ։ Նախագահի պաշտոնը ստանձնում եք ծանրագույն իրավիճակում, երբ Արցախը գտնվում է անվտանգային, քաղաքական ու տնտեսական լրջագույն մարտահրավերների հանդիման։ 9-ամսյա փաստացի շրջափակման պայմաններում պետությունը հերոսաբար մաքառում է իր ազատ ու անկախ ապրելու իրավունքի համար: Հավատում ենք, որ համայն հայության հաստատակամությամբ, ինչպես նաև միջազգային հանրության աջակցությամբ պիտի կարողանանք հասնել հայրենի հողի վրա արցախահայության ինքնորոշման անօտարելի իրավունքի պաշտպանությանը»,- ասված է ուղերձում:
Վեհափառը շեշտել է, որ Շահրամանյանը բարեխիղճ, անձնվեր և նախանձախնդիր ծառայել է իր հայրենիքին և հույս է հայտնել, որ նա իր փորձառությամբ և հեղինակությամբ կնպաստի Արցախում համերաշխ միասնականության ու համագործակցության մթնոլորտի հաստատմանը։
Հիշեցնենք, որ սեպտեմբերի 10-ին Արցախի Հանրապետության Ազգային ժողովում հատուկ նիստի ընթացքում կայացել է Արցախի նորընտիր նախագահի երդմնակալության արարողությունը։
Արցախի անվտանգության խորհրդի նախկին քարտուղար, օգոստոսի վերջին պետնախարար նշանակված Սամվել Շահրամանյանը սեպտեմբերի 9-ին Ազգային ժողովում տեղի ունեցած արտահերթ նիստում ընտրվել էր Արցախի Հանրապետության նախագահի պաշտոնում։
Արցախի արդեն նախկին նախագահ Արայիկ Հարությունյանը հրաժարականի դիմում էր ներկայացրել ԱԺ սեպտեմբերի 1-ին։