ԵՐԵՎԱՆ, 8 սեպտեմբերի – Sputnik. Երևանում ընթացող հայ-ռուսական մեդիաֆորումը, որը հավաքել է ՀՀ և ՌԴ հայտնի քաղաքագետներին և մեդիափորձագետներին, օգտակար է առաջին հերթին կառուցողական և անկեղծ զրույցի համար: Այս մասին Sputnik Արմենիային ասաց Ռուսաստանի գիտությունների ակադեմիայի «Համաշխարհային տնտեսության և միջազգային հարաբերությունների ինստիտուտի» տնօրենի պաշտոնակատար Ֆյոդոր Վոյտոլովսկին։
«Ես կարծում եմ, որ միշտ լավ է խոսելը։ Հիանալի է, երբ ընկերները վստահելի են և ռազմավարական կապերով կապված մարդիկ են, կարողանում են միմյանց հետ անկեղծորեն խոսել խնդիրների մասին։ Շատ վատ կլիներ, եթե բոլորս ժպտայինք ու ձևացնեինք, թե ոչ մի վատ բան տեղի չի ունենում»,– կարծիք հայտնեց նա՝ մեկնաբանելով երկկողմ հարաբերություններում վերջին շրջանում ստեղծված բացասական տեղեկատվական միջավայրը։
Փորձագետը կարծում է` երբ կողմերը մատնանշում են խնդիրներն ու դժվարությունները, ռիսկերն ու հնարավորությունները և պատրաստ են միմյանց օգնել, համագործակցություն առաջարկել, հենց դա է ռազմավարական գործընկերությունն ու դաշնակցությունը:
«Իհարկե, քաղաքական իրավիճակն իր վերելքներն ու անկումներն է ապրում, և մենք տեսնում ենք, որ այժմ ավելի շատ բացասական միտում կա։ Մինչդեռ կարելի է վերադառնալ նորմալ քաղաքական երկխոսությանը։ Շատ բան կախված է նրանից, թե արդյոք Հայաստանի կառավարությունը կհետևի արևմտյան, առաջին հերթին՝ ԱՄՆ-ի և նրա դաշնակիցների ճնշումներին, արդյոք նա թույլ կտա չմտածված ռազմավարական սխալներ Հայաստանի համար։ Եթե դա տեղի չունենա, ապա մենք կկարողանանք տեղեկատվական ներարկումներով ամեն ինչ վերադարձնել բնականոն հուն»,– համոզմունք հայտնեց Վոյտոլովսկին։
Հիշեցնենք, որ սեպտեմբերի 6-8-ը Հայաստանում անցկացվում է հայ–ռուսական մեդիաֆորում, որի մասնակիցների թվում են Ռուսաստանի Դաշնության և Հայաստանի Հանրապետության լրատվական դաշտի ներկայացուցիչներ և առաջատար վերլուծական կենտրոնների փորձագետներ: