ԵՐԵՎԱՆ, 8 սեպտեմբերի - Sputnik. ԱՄՆ–ում բնակվող հայազգի հեռուստաաստղ Քիմ Քարդաշյանը ուղերձ է հղել ԱՄՆ նախագահ Ջո Բայդենին՝ հույս հայտնելով, որ նա կկանխի ևս մեկ Հայոց ցեղասպանություն` պատժամիջոցներ կիրառելով Ադրբեջանի դեմ։ Նա «Rolling Stone» ամսագրում հրապարակել է հոդված իր պրոդյուսեր Էրիկ Իսրայելյանի հետ։
«Մենք Հայոց ցեղասպանությունը վերապրածների ժառանգներն ենք և չենք ցանկանում խոսել ապագայում ևս մեկ ցեղասպանության ճանաչման կամ հիշատակի հավերժացման մասին»,– գրել է նա:
Հեռուստաաստղն ուշադրություն է հրավիրել այն հանգամանքի վրա, որ Ուկրաինայում ռազմական գործողությունները հանգեցրել են նրան, որ որոշ երկրներ նավթ ներկրելու համար, ստիպված են եղել հույսը դնել Ադրբեջանի վրա: Բաքուն այս հանգամանքը օգտագործում է որպես զենք` տարածաշրջանի հայ բնակչության դեմ։
«Ամբողջ աշխարհում կառավարությունների լռությունը միայն թեժացնում է իրավիճակը։ Խնդրում եմ ձեզ դադարեցնել օգնությունն Ադրբեջանին և բոյկոտել այդ երկրում տեղի ունեցող միջազգային միջոցառումները»,– գրել է նա։
Նշենք, որ ավելի վաղ Միջազգային քրեական դատարանի նախկին դատախազ Լուիս Մորենո Օկամպոն կոչ էր արել ամերիկացի հեռուստաաստղ Քիմ Քարդաշյանին և պրոդյուսեր Էրիկ Իսրայելյանին Լեռնային Ղարաբաղի բնակչության ձայնը հասցնել ԱՄՆ պետքարտուղար Էնթոնի Բլինկենին:
Հիշեցնենք` 2022–ի դեկտեմբերի 12-ին քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակեցին Արցախը ՀՀ–ին կապող Ստեփանակերտ-Գորիս մայրուղին, որտեղից հեռացան ապրիլի 28-ին, քանի որ ապրիլի 23-ին Ադրբեջանն անցակետ տեղադրեց Լաչինի ճանապարհի վրա` այն ամբողջությամբ առնելով իր վերահսկողության տակ։ Արցախը զրկվել է նաև ՀՀ–ից մատակարարվող գազից և էլեկտրաէներգիայից։
Հուլիսի 26-ին առաջին անհրաժեշտության շուրջ 400 տ ապրանքով բեռնված 19 բեռնատար Երևանից ուղևորվեցին շրջափակման մեջ գտնվող Արցախ։ Բեռնատարները հասել են Սյունիքի Կոռնիձոր համայնք և մինչ օրս կանգնած են Լաչինի միջանցքի սահմանին։
Օգոստոսի 30–ից սահմանին կանգնած են մնացել նաև Ֆրանսիայի տարբեր քաղաքներից Արցախի համար բեռ տանող ֆրանսիական բեռնատարները։