ԵՐԵՎԱՆ, 8 սեպտեմբերի – Sputnik. Սյունիքում ապօրինի կերպով զենք-զինամթերք ձեռք բերելու, պահելու և իրացնելու կասկածանքով ձերբակալված 7 անձանցից 2-ը ձերբակալվել են հրազեն ու ռազմամթերք ապօրինի կերպով իրացնելու պահին։ Տեղեկությունը հայտնում է ՀՀ քննչական կոմիտեի մամուլի ծառայությունը։
Ավելի վաղ տեղեկացրել էինք, որ Սյունիքի մարզում սեպտեմբերի 6-ին և 7-ին ձերբակալվել է 7 անձ, այդ թվում՝ ռուսամետ բլոգեր Միկա Բադալյանը և Sputnik Արմենիայի սյունակագիր Աշոտ Գևորգյանը։
ՀՀ քննչական կոմիտեի հաղորդագրությունից պարզ է դառնում, որ ձերբակալությունները կապված են ավելի վաղ նախաձեռնված քրեական վարույթի նախաքննության հետ։
«Սյունիքի մարզային քննչական վարչության Գորիսի քննչական բաժնում շարունակվում է Գորիս համայնքի Վերիշեն բնակավայրի բնակչի կողմից, նախնական համաձայնությամբ, մի խումբ անձանց հետ իրացնելու նպատակով ապօրինի կերպով զենք-զինամթերք ձեռք բերելու, պահելու և իրացնելու դեպքի առթիվ 2023թ. օգոստոսի 24-ին ՀՀ ԱԱԾ քննչական դեպարտամենտում ՀՀ քրեական օրենսգրքի 335-րդ հոդվածի 2-րդ մասով նախաձեռնված քրեական վարույթի նախաքննությունը»,- նշում է ՔԿ–ն։
ԱԱԾ ծառայողների կողմից տվյալներ են ձեռք բերվել, որ հանցավոր գործունեության շղթայում ներգրավված է ևս 7 անձ։ Նրանք սեպտեմբերի 6-ին և 7-ին ՀՀ ԱԱԾ աշխատակիցների կողմից ձերբակալվել և ներկայացվել են վարույթն իրականացնող մարմին։
ՔԿ-ից հայտնում են, որ կատարվել է դեպքի վայրի զննություն, ինչպես նաև բնակարանների և ավտոմեքենաների խուզարկություններ, հարցաքննություններ։ Արդյունքում առգրավվել են «AK» տեսակի ինքնաձիգ, մարտական փամփուշտներ, նռնակներ, նռնակի պայթուցիչներ, ատրճանակներ, սվին դանակներ, տարբեր տեսակի ու ռազմական նշանակության գույք, կանեփ տեսակի բույսի թփեր։ Նշանակվել են դատաձգաբանական և դատաքիմիական փորձաքննություններ:
Նախաքննությունը շարունակվում է: Իրավապահները փորձում են պարզել նաև զենք-զինամթերք ձեռք բերելու աղբյուրն ու նպատակները։
Հիշեցնենք՝ Sputnik Արմենիա ռադիոկայանի «Մենք» հաղորդաշարի հեղինակ Աշոտ Գևորգյանի փաստաբանը մեզ հետ զրույցում նշել էր, որ իր պաշտպանյալը որևէ առնչություն չունի զինամթերքի ապօրինի շրջանառության հետ կապված քրեական վարույթի հետ։ Նրա խոսքով` Գևորգյանն այժմ գտնվում է Գորիսի ձերբակալվածների պահման վայրում։ Նշենք, որ ըստ օրենքի` անձը ձերբակալվում է 72 ժամով։
Հավելենք, որ Աշոտ Գևորգյանը մեկնել էր Սյունիք սահմանամերձ բնակավայրերի մասին ռադիոնյութեր պատրաստելու համար։ Նրա հաղորդումներում 2020-ի պատերազմում պարտությունից հետո սուր-քննադատական գնահատականներ կան։