ԵՐԵՎԱՆ, 7 սեպտեմբերի – Sputnik. ՀՀ էկոնոմիկայի նախարար Վահան Քերոբյանը կառավարության դիմաց բողոքող տնտեսվարողներին առաջարկում է դիմել Մրցակցային պաշտպանության հանձնաժողով, որպեսզի այնտեղ փորձեն լուծել իրենց խնդիրները։ Այս մասին նա հայտարարեց այսօր կառավարության նիստից հետո։
Ավելի վաղ հայտնել էինք, որ արդեն երկու օր է` տնտեսվարողները բողոքի ակցիա են անում ՀՀ կառավարության դիմաց։ Նրանք պահանջում են արգելել «Wildberries»–ից ռուսական տարբերակով ապրանքներ պատվիրելու հնարավորությունը և հավասար պայմաններ ստեղծել իրենց համար։
«Երբ «Wildberries»-ն ապրանք է ներմուծում, կամ սպառողը ապրանք է գնում «Wildberries»-ից, ԱԱՀ-ի պարտավորությունն արդեն տեղափոխվում է Հայաստան: «Wildberries»-ը պարտավոր է արդեն ԱԱՀ վճարել վաճառքի համար: Այն, ինչ փոքր ու միջին ձեռնարկատերերը չեն մուծում: Այսինքն` կարելի է ասել, որ «Wildberries»-ն է վատ իմաստով գտնվում անհավասար մրցակցային պայմաններում, քան տեղական փոքր ու միջին ձեռնարկությունները»,– ասաց նա։
Քերոբյանը նշեց, որ սա տասնյակ տարիներ քննարկվող թեմա է։ Նույնն է նաև, երբ մեծ սուպերմարկետներն ապրանքն ավելի էժան են վաճառում, քան փոքր խանութները գնում են այդ ապրանքները։ Դա տնտեսական հարց է` ավելի մեծ մասշտաբով առևտրաշրջանառություն կատարողներն ավելի ցածր գին են վճարում ապրանքի համար։
Նախարարը նշեց, որ աշխարհում առևտրի ձևը փոխվում է, և անգամ ԱՄՆ-ում խոշոր առևտրային ընկերություններ դադարեցրել են իրենց գործունեությունը առցանց առևտրի զարգացմանը զուգընթաց։
Կառավարության նիստից հետո այս թեմային անդրադարձավ նաև ՊԵԿ նախագահ Ռուստամ Բադասյանը։ Նա վստահեցրեց, որ այն, ինչ կարող է կապված լինել իր ղեկավարած կառույցի հետ, դեռ անցած տարի արվել է։
«ՊԵԿ-ն օրենսդրական նախաձեռնությամբ է հանդես եկել, որ ԵԱՏՄ տարածքում էլեկտրոնային առևտրի մասով ոչ թե գործի ռեզիդենտության երկրի կանոնը, այլ սպառման երկրի կանոնը։ Դա նշանակում է, որ «Wildberries»-ը մինչ այս տարի հայ սպառողներին ապրանք մատակարարելիս չէր վճարում ԱԱՀ, իսկ այս տարվանից վճարում է»,– ասաց Բադասյանը:
Ավելին, նրա խոսքով, ՊԵԿ–ը հետևել է, որ «Wildberries»-ը որևէ առումով առավելություն չունենա։