ԵՐԵՎԱՆ, 7 սեպտեմբերի – Sputnik. ԵԱՏՄ–ում փոխադարձ կճանաչեն գիտական աստիճանները, որը կնպաստի աշխատանքի տեղավորմանն անդամ պետություններում։ ՀՀ կառավարությունն այսօր վավերացրեց «Եվրասիական տնտեսական միության անդամ պետություններում գիտական աստիճանների վերաբերյալ փաստաթղթերի փոխադարձ ճանաչման մասին համաձայնագիրը»։
«Այս համաձայնագրի վավերացմամբ կկարգավորվի գիտական աստիճանների վերաբերյալ փաստաթղթերի փոխադարձ ճանաչումը՝ աշխատանքային միգրացիայի ոլորտում մասնագիտական գործունեության իրականացման հասանելիությունն այդ փաստաթղթերն ունեցող անձանց համար ապահովելու նպատակով»,– նշված է որոշման հիմնավորման մեջ։
Համաձայնագիրը հանդիսանում է մինչև 2025 թ. եվրասիական տնտեսական ինտեգրման զարգացման ստրատեգիական ուղղությունների իրականացման պլանի միջոցառումներից մեկը, որի նպատակն է գիտական աստիճանների վերաբերյալ փաստաթղթերի համապատասխանության ճանաչման միջոցով վերացնել աշխատանքային միգրացիայի ոլորտում բացառումները և սահմանափակումները։
Այն 2023 թ. հունիսի 8-ին ստորագրել է ՀՀ վարչապետ Նիկոլ Փաշինյանը: