ԵՐԵՎԱՆ, 6 սեպտեմբերի – Sputnik. ՀՀ ՊՆ պաշտպանական քաղաքականության և միջազգային համագործակցության վարչության պետ Լևոն Այվազյանը օտարերկրյա ռազմական կցորդների ու ներկայացուցիչների հետ խոսել է հայ-ադրբեջանական սահմանին ստեղծված օպերատիվ իրավիճակի մասին։ Տեղեկությունը հայտնում է ՀՀ ՊՆ մամուլի ծառայությունը։
«Օտարերկրյա պաշտոնյաներին ներկայացվել են վերջին օրերին սահմանին տիրող իրավիճակի մանրամասները։ Լևոն Այվազյանը նաև պատասխանել է հետաքրքրող հարցերին»,– ասված է հաղորդագրությունում։
Հանդիպմանը նշվել է, որ ՀՀ զինված ուժերն իրենց պարտականությունների շրջանակում ձեռնարկում են բոլոր անհրաժեշտ քայլերը իրավիճակի հետագա սրացում թույլ չտալու համար։
Հիշեցնենք, որ վերջին շրջանում ադրբեջանական ԶՈւ–ն պարբերաբար գնդակոծում է ՀՀ Գեղարքունիքի մարզի ուղղությամբ տեղակայված հայկական դիրքերը։ Ադրբեջանական ԶՈւ–ն սեպտեմբերի 1-ին՝ ժամը 07:50-ից սկսած, ինտենսիվ կրակ է բացել Գեղարքունիքի մարզի Սոթք և Նորաբակ համայնքների հատվածում տեղակայված հայկական դիրքերի ուղղությամբ։ Ադրբեջանը կիրառել է նաև ականանետեր և անօդաչու սարքեր: Հայկական կողմն ունի 3 զոհ, 2 վիրավոր: