ԵՐԵՎԱՆ, 6 սեպտեմբերի – Sputnik. Բելգիայի էներգետիկայի նախարար Թինե վան դեր Ստրետենը «միանգամայն անհրաժեշտ» է համարում մինչև 2027 թվականը ԵՄ ռուսական գազի ներկրումից ազատվելը, սակայն կարծում է, որ ՌԴ-ից վառելիքի դեմ պատժամիջոցների սահմանումը քիչ հավանական է, քանի որ պահանջում է Եվրամիության բոլոր երկրների աջակցությունը: Տեղեկությունը հայտնում է ՌԻԱ Նովոստին։
«Ամենաարդյունավետ բանը, որ մենք կարող ենք անել, ընդհանուր առմամբ հանածո վառելիքի օգտագործումից ազատվել և համոզվել, որ մենք ինքներս ենք վերահսկում էներգետիկայի ոլորտը», - ասել է Ստրետենը Financial Times թերթին տված հարցազրույցում:
Բելգիան աշխարհում ռուսական հեղուկացված բնական գազի երրորդ խոշորագույն ներմուծողն է Չինաստանից և Իսպանիայից հետո, այդ թվում՝ Բելգիայի տարածքով այլ երկրներ գազի տարանցման պատճառով:
«Բելգիան պաշտպանել է վառելիքի դեմ պատժամիջոցների սահմանումը, սակայն նման քայլը քիչ հավանական է, քանի որ պահանջում է ԵՄ բոլոր երկրների աջակցությունը», - թերթը մեջբերուն է նրա խոսքերը:
Ինչպես ավելի վաղ հայտնել էր Եվրահանձնաժողովի ներկայացուցիչ Թիմ Մաքֆին, ԵՄ-ն 2023 թվականի հունվարից հունիս ընկած ժամանակահատվածում արդեն ներմուծել է 10,9 մլրդ խորանարդ մետր ռուսական հեղուկացված բնական գազ։ Ընդ որում, ամբողջ 2022 թվականի համար այդ թիվը, ըստ նրա, կազմել է 19,3 մլրդ խմ, իսկ 2021 թվականի համար՝ 13,5 մլրդ։