ԵՐԵՎԱՆ, 6 սեպտեմբերի – Sputnik. ՀՀ վարչապետի կինը` Աննա Հակոբյանը, Կիևում կազմակերպված «Առաջին տիկնանց և ամուսինների» երրորդ գագաթնաժողովում բարձրացրել է Լաչինի միջանցքի շրջափակման հետևանքով 30 հազար հայ երեխաների իրավունքների ոտնահարման հարցը։ Նա այդ մասին գրել է ֆեյսբուքյան էջում։
«Կիևում ջերմ և անմիջական շփում ունեցա Չեխիայի, Էստոնիայի, Սերբիայի, Ուկրաինայի, Լիտվայի առաջին տիկինների և Դանիայի, Սլովենիայի և Սլովակիայի պարոնների հետ։ Գագաթնաժողովի ժամանակ խոսեցի խաղաղության, ապագա սերունդներին ավելի լավ աշխարհ ժառանգելու մասին։ Բարձրացրեցի Լաչինի միջանցքի բլոկադայի արդյունքում 30 հազար հայ երեխաների իրավունքների ոտնահարման և կյանքի անմարդկային պայմանների հարցը»,– գրել է նա։
Նշենք, որ «Առաջին տիկնանց և ամուսինների» երրորդ գագաթնաժողովն անցկացվում է Ուկրաինայի առաջին տիկին Ելենա Զելենսկայայի նախաձեռնությամբ։ 3-րդ գագաթնաժողովի գլխավոր թեման եղել է հոգեկան առողջությունը և դրան առնչվող այլ հարցեր։
Ավելի վաղ լրատվամիջոցները գրել էին, որ Հայաստանն առաջին անգամ հումանիտար օգնություն է ուղարկում Ուկրաինա, որն ուղեկցելու է Նիկոլ Փաշինյանի տիկինը։
Պարզելու համար՝ արդյոք լուրը համապատասխանում է իրականությանը, թե ոչ, Sputnik Արմենիան կապ էր հաստատել Աննա Հակոբյանի օգնական Ստելլա Սարուխանյանի հետ։ Նա ասել էր, որ ինքը տեղյակ չէ տիկնոջ անձնական այցերից, ամեն բան չէ, որ իրեն հայտնում են։