Վերջին տարիներին Գյումրին դարձել է զբոսաշրջիկների համար հետաքրքիր քաղաք. այստեղկարելի է հանդիպել տուրիստների տարբեր երկրներից։ Թեև այս պահին դեռ վիճակագրական տվյալներ չկան Գյումրի այցելած հյուրերի մասով, բայց ոչ միայն տուրիստական ընկերություններն ուհյուրանոցները, այլ նույնիսկ շարքային գյումրեցիներն են վկայում՝ այն հոսքը չէ, ինչ անցած տարի։ Ամառային սեզոնին քաղաքում փառատոներ, մրցույթներ եղել են, բայց ասել, որ դրանց շնորհիվ քաղաքում սեզոնին աճ նկատվեց, սխալ է՝ դրանք հիմնականում մեկ կամ երկու օր էին ու մեծ ազդեցություն չունեցան հոսքի վրա։
Զբոսաշրջիկների թվի նվազման պատճառների մասին խոսելիս Sputnik Արմենիայի զրուցակիցներն առաջին հերթին գների բարձրացումն են շեշտում։
«Եթե անցած տարի Գյումրիի սպասարկման օբյեկտներում գները անհամեմատ մատչելի էին Երևանի համեմատ, այս տարի գները երևանյան են, սպասարկումը՝ վատ։ Հատկապես քաղաքի կենտրոնում գտնվող օբյեկտներն են թանկացել»,-մեզ հետ զրույցի ժամանակ ասաց Արթուրը, որը պարբերաբար Երևանից Գյումրի է գալիս՝ ընկերներին հյուր։
Թանկացման մասին ահազանգում են նաև տուրիստական ընկերությունները` գների աճը որակելով անտրամաբանական։
«Թանկացումները նկատելի են ամենուր։ Մենք պետք է վերանայենք գնային քաղաքականությունը, պետք է նայենք, թե մեր քաղաքն ինչ է առաջարկում հյուրերին, ինչով ենք գրավիչ, հետաքրքիր, տարբերվող, նոր մտածենք գներ թանկացնելու մասին»,-ասում է տուրիստական ընկերության պատասխանատու Լիզա Գասպարյանը։
Այն, որ Գյումրիում գները թանկացել են, առաջինը զգում են գյումրեցիները։ Կարծում են` գնաճի պատճառը մասնավորի նկատմամբ վերահսկողության բացակայությունն է։
«Միլանի կենտրոնում սուրճ խմելն ավելի մատչելի է, քան Գյումրիում»,-ասում է Գյումրիի բնակիչ Աստղիկ Եդիգարյանը։
Սրճարաններից մեկի մենեջերը, չցանկանալով ներկայանալ, փաստեց՝ թանկացում կա, բայց դա վերանայված ճաշացանկի հաշվին է։
Տուրիստական ընկերությունները խնդրի լուծման իրենց տարբերակներն ունեն։ Նրանք կարծում են, որ նախ գնային քաղաքականության վերանայում պետք է լինի մասնավորի կողմից, ապա նաև պետական մոտեցում։ «Շիրակ» օդանավակայանի հնարավորությունները, ըստ նրանց, պետք է արդյունավետ օգտագործվեն, կազմակերպվեն չարտերային թռիչքներներ, ենթակառուցվածքները բարելավվեն։