ԵՐԵՎԱՆ, 1 սեպտեմբերի – Sputnik. ՀԱՊԿ–ի «Մարտական եղբայրություն» զորավարժությունները Լեհաստանն ընկալել է որպես «հոգեբանական պատերազմի տարր»։ Այս մասին լրագրողներին հայտնել է հանրապետության ներքին գործերի նախարար Մարիուշ Կամինսկին։
Սեպտեմբերի 1-ին Բելառուսում մեկնարկել են «Մարտական եղբայրություն-2023» ՀԱՊԿ զորավարժությունները, որոնք կտևեն մինչև սեպտեմբերի 6-ը։ Բելառուսն ու ՀԱՊԿ քարտուղարությունը միջազգային գործընկերներին նախազգուշացրել են զորավարժությունների անցկացման մասին` հրավիրելով օտարերկրյա դիտորդների։ Ավելի վաղ ՀԱՊԿ միացյալ շտաբի պետ Անատոլի Սիդորովը ընդգծել էր, որ Բելառուսում առաջիկա զորավարժությունների շրջանակում ՀԱՊԿ–ն ագրեսիա չի դրսևորում և իր գործողությունները չի ուղղում երրորդ երկրների դեմ։ Նա ասել էր, որ Բելառուսում անցկացվող զորավարժություններին որպես դիտարոդ հրավիրվել են Սաուդյան Արաբիայի, Իրանի, ՉԺՀ–ի և Մոնղոլիայի ներկայացուցիչները։
«Այսօր, սահմանի մյուս կողմում, Բելառուսում, ռուս–բելառուսական զորավարժություններ են անցկացվում, այդ թվում մեր սահմանի մոտ։ Դա պատահական չէ, որ դրանք մեկնարկել են սեպտեմբերի 1-ին։ Դա հենց այդ հոգեբանական պատերազմի տարրն է», – Երկրորդ համաշխարհային պատերազմի սկսման տարելիցին նվիրված իր ելույթում այսօր ասել է Կամինսկին։
Բելառուսի տարածքում ՀԱՊԿ «Մարտական եղբայրություն-2023» համատեղ օպերատիվ-ռազմավարական զորավարժությունների շրջանակում անցկացվում են «Փոխգործակցություն-2023» զորավարժությունները ՀԱՊԿ արագ արձագանքման հավաքական ուժերի հետ, հատուկ վարժանքներ՝ «Որոնում-2023» հետախուզական ուժերի հետ և միջոցներով, հատուկ զորավարժություններ «Էշելոն-2023» նյութատեխնիկական աջակցման ուժերի հետ և միջոցներով, հատուկ վարժանքներ՝ «Խոչընդոտ-2023»–ի ՌՔԿ պաշտպանության և բժշկական ապահովման զորամիավորման հետ: Զորավարժություններն անցկացվելու են Բրեստի, Գրոդնոյի և Մինսկի զորավարժարաններում և տարածքներում։