ԵՐԵՎԱՆ, 1 սեպտեմբերի – Sputnik. ՀՀ Գեղարքունիքի մարզի Սոթք գյուղում առավոտյան հստակ երևացել է գնդակոծությունը, բայց ներկա պահին հարաբերական անդորր է։ Այս մասին լրագրողների հետ զրույցում ասաց Գեղամասար խոշորացված համայնքի նախկին ղեկավար Հակոբ Ավետյանը։
«Առավոտյան տեղի ուենցածն ահավոր տեսարան էր, որովհետև գնդակոծությունները երևում էին։ Կարող եմ ասել, որ կրակն ուղղված էր պոստերի վրա։ Բնակիչների շրջանում ամեն դեպքում խուճապ կար, բայց մենք փորձում ենք դա զսպել մեր մեջ, անձամբ ես երեխաներիս չեմ տարհանել, որպեսզի օրինակ ցույց տամ։ Պետք չէ ամեն նմանատիպ իրավիճակում տարհանվել, ընդհակառակը, պետք է պատրաստ լինենք հակահարված տալուն»,– ասաց Ավետյանը։
Դիտարկմանը, արդյոք գյուղացիները պատրաստ են հնարավոր լայնածավալ սադրանքների կամ մարզում ապաստարաններ կա՞ն, նա ընդգծեց, որ ամեն ինչ էլ կա, պետական մասշտաբով էլ են աշխատանքներ արվել։
«Գյուղացիները 44-օրյա պատերազմ են տեսել, սեպտեմբերյան ագրեսիան են տեսել, նրանք արդեն հոգեբանորեն պատրաստ են։ Գիտեն, թե ինչ անեն պատերազմական գործողությունների դեպքում»,-ասաց նա։
Հիշեցնենք` ադրբեջանական ԶՈւ–ն սեպտեմբերի 1-ին՝ ժամը 07:50-ից սկսած, ինտենսիվ կրակ է բացել Գեղարքունիքի մարզի Սոթք և Նորաբակ համայքների հատվածում տեղակայված հայկական դիրքերի ուղղությամբ, ինչի հետևանքով հայկական կողմն ունի 4 զոհ և 1 վիրավոր: Ադրբեջանական ԶՈւ-ն կիրառել են նաև ականանետեր և անօդաչու սարքեր: