ԵՐԵՎԱՆ, 31 օգոստոսի–Sputnik. Այս կիսամյակի ընթացքում ՀՀ քննչական կոմիտեի վարույթում քննվել է ընտանեկան բռնության վերաբերյալ 1051 քրեական վարույթ: Տեղեկությունը հայտնում է ՔԿ մամուլի ծառայությունը։
«Դրանցից 140-ն ավարտվել է մեղադրական եզրակացությամբ և 144 անձի վերաբերյալ ուղարկվել է դատարան, 2-ն ավարտվել է եզրափակիչ ակտով և ուղարկվել դատարան։ 222 քրեական վարույթ կարճվել է, որից 172-ը` ռեաբիլիտացնող, իսկ 50-ը` ոչ ռեաբիլիտացնող հիմքով, 83-ով ավարտվել են վարութային և ապացուցողական գործողությունները։ 7 քրեական վարույթ ուղարկվել է ըստ ենթակայության, 76-ը միացվել է, 521 քրեական վարույթ փոխանցվել է 2023թ. 2-րդ կիսամյակ»,– նշված է տարածած հաղորդագրության մեջ:
Դատարան ուղարկված վարույթներով 144 մեղադրյալից 110-ը եղել են կին կամ ամուսին, 20-ի դեպքում` ծնող, նաև տատ ու պապ, 5-ը՝ քույր և եղբայր, 9-ը՝ զավակ կամ թոռ:
152 տուժողից 14-ը եղել են մինչև 12, 4-ը՝ 12-ից 14, ևս 4-ը՝ 14-ից 18, 130-ը՝ 18-ից բարձր տարեկան:
Վարույթները վերաբերել են տարբեր հանցագործությունների։ Դատարան ուղարկված վարույթներից 2-ը քննվել են սպանության, 3-ը՝ սպանության փորձի, 3-ը՝ առողջությանը ծանր վնաս պատճառելու, 2-ը՝ առողջությանը միջին ծանրության վնաս պատճառելու, 1-ը՝ ազատությունից ապօրինի զրկելու, 2-ը՝ սեքսուալ բնույթի գործողությունների, 11-ը՝ առողջությանը թեթև վնաս պատճառելու, 116-ը՝ այլ հանցագործությունների դեպքերի առթիվ: