ԵՐԵՎԱՆ, 30 օգոստոսի – Sputnik. Իսպանիայի արտգործնախարարությունը դիվանագիտական բողոք է ուղղել Մադրիդում Մեծ Բրիտանիայի դեսպանատանը` կապված օգոստոսին Ջիբրալթարի ժայռի (որին հավակնում է Մադրիդը) մոտ գտնվող ջրերում տեղի ունեցած միջադեպերի հետ։ Տեղեկությունը հայտնում է Pais թերթը։
«Արտգործնախարարությունը դիվանագիտական բողոք է հղել Մադրիդում Մեծ Բրիտանիայի դեսպանատանը Ջիբրալթարի ժայռի մոտ գտնվող ջրերում օգոստոսին տեղի ունեցած երեք լուրջ միջադեպերի հետ կապված»,–ասվում է հաղորդագրության մեջ։
Նշվում է, որ ԱԳՆ–ն վճռական բողոք է արտահայտել Իսպանիայի իրավասության ներքո գտնվող ջրերում տեղի ունեցած գործողությունների առնչությամբ։
Պարբերականի տվյալներով` առաջին միջադեպը տեղի է ունեցել օգոստոսի 1-ին, երբ Պանամայի դրոշով տանկերը վառելիք է թափել իսպանական ջրերում։ Դա տեղի է ունեցել, երբ տանկերը բաց ծովում լցավորվում էր։ Արդյունքում բիտումի հետքերը հասել են ափ։ Իսպանիայի ԱԳՆ–ն նոտայում հիշեցրել է, որ Իսպանիայի կառավարությունը արգելում է ջրերում տանկերների լցավորումը, սակայն Ջիբրալթարի իշխանություններն այն թույլատրում են։
Երկրորդ միջադեպը տեղի է ունեցել օգոստոսի 14-ին։ Այդ օրը Մեծ Բրիտանիայի երեք պետական նավերի «խանգարել են աշխատել» մաքսային վերահսկողության ծառայության նավին։
Թերթի տվյալների համաձայն` երրորդ միջադեպը տեղի է ունեցել օգոստոսի 21-ին, երբ ձկնորսական նավը և նավապետը հետապնդվել են բրիտանական պետական նավերի կողմից ժայռի մոտակայքի իսպանական ջրերում` խախտելով Իսպանիայի ինքնիշխանությունը։
Մադրիդում Մեծ Բրիտանիայի դեսպանատունը մերժել է թերթին մեկնաբանություն տալ։
Ջիբրալթարը երեք դար շարունակ Իսպանիայի և Մեծ Բրիտանիայի միջև խոչընդոտ է եղել։
Իսպանիան Ջիբրալթարն իր տարածքն է համարում, սակայն 1967 և 2002 թվականներին կայացած հանրաքվեի ընթացքում ջիբրալթարցիների ավելի քան 90%–ը ցանկացել է մնալ Մեծ Բրիտանիայի վերահսկողության տակ։ Դրա տարածքում սահմանադրություն է գործում, որն ընդունվել է 2006 թվականի հանրաքվեի ժամանակ, որի համաձայն օրենսդիր իշխանությունը պատկանում է բրիտանական միապետին և Ջիբրալթարի խորհրդարանին։