Հայերն իրենց տեսակով ուրախ ժողովուրդ են և հիմա կարիք ունեն խաղաղության, որն ամենակարևորն է ցանկացած երկրի համար: Աշխարհահռչակ կոմպոզիտոր և երաժիշտ Գորան Բրեգովիչը Sputnik Արմենիային տված հարցազրույցում խոսել է Հայաստանի, իր կարիերայում հայկական երաժշտության ազդեցության, խաղաղության և իր նոր՝ «Աշխարհի պորտը» («The Belly Button Of The World») ալբոմի ու համանուն ստեղծագործության մասին։
«Մի քանի անգամ եմ եղել Հայաստանում, բայց հասկացել եմ, որ հայերը գենետիկորեն երջանիկ մարդիկ են, չնայած պատերազմների։ Ազգի կենսագրության մեջ անգամ մեկ պատերազմ ունենալը սարսափելի է, բայց հայերը կարողանում են ուրախանալ»,-ասաց նա։
Աշխարհահռակ կոմպոզիտորի խոսքով՝ իր կարիերայում հայկական երաժշտությունը ևս ունեցել է իր ազդեցությունը։
«Տարիներ առաջ, երբ շատ էի լսում երաժշտություն, լսել եմ նաև դուդուկ, որը հայկական երաժշտության խորհրդանիշն է: Տարիքի հետ գնալով ավելի քիչ եմ երաժշտություն լսում, կարծում եմ դա վերաբերում է բոլոր կոմպոզիտորներին»,-ասաց նա։
Անդրադառնալով իր նոր՝ «Աշխարհի պորտը» ալբոմին կոմպոզիտորը նշեց, որ փորձել է աշխարհին միաժամանակ ներկայացնել քրիստոնեական, հրեական և մահմեդական երաժշտությունը «ջութակի լեզվով»։ Ի դեպ, ջութակը Գորան Բրեգովիչի առաջին երաժշտական գործիքն է եղել, որի վրա, իր խոսքով՝ մինչև հիմա էլ լավ նվագել չի սովորել։
Ճանաչված երաժիշտի խոսքով՝ «Աստվածն իր օրակարգում չի ներառել» ազգերի խաղաղ համակեցության հարցը, ուստի դա ազգերն իրենք պիտի լուծեն: Ինքը փորձում է իր երաժշտության միջոցով ներդաշնակություն բերել աշխարհին, ներկայացնելով ինչպես քրիստոնյաների, այնպես էլ մահմեդականների ու հրեաների երաժշտությունը։
Նա վստահ է, որ երաժշտությունը հզոր ուժ է և կարող է միավորել ազգերին և մի օր աշխարհը խաղաղ դարձնել։