ԵՐԵՎԱՆ, 28 օգոստոսի – Sputnik. Ալ. Սպենդիարյանի անվան օպերայի և բալետի ազգային ակադեմիական թատրոնի թատերախումբը «Թումո» ստեղծարար տեխնոլոգիաների կենտրոնի բացօթյա այգում կրկին հանդես կգա ներկայացումներով։ Տեղեկությունը Երևանի քաղաքապետարանի գործակարգավարական խորհրդակցության ժամանակ հայտնեց Մշակույթի և տուրիզմի վարչության պետ Գոշ Սարգսյանը։
«Երևանի քաղաքապետարանի նախաձեռնությամբ «Թումոյի» այգում սեպտեմբերի 12–ից 15–ը կիրականացվի ևս մեկ մասշտաբային մշակութային նախագիծ։ Կազմվել է օպերային ներկայացումների ծրագիրը, տարվում են համապատասխան աշխատանքներ տեղանքի կազմակերպման, բեմական, տեխնիկական ենթակառուցվածքների մոնտաժման գործընթացի իրականացման նպատակով»,–ասաց Սարգսյանը։
Երևանի բնակիչների համար անվճար հիմունքներով կցուցադրվեն Հայաստանի օպերայի և բալետի ազգային թատրոնի երգացանկային ներկայացումները։ Նախագիծը կեզրափակվի Օպերա գալա համերգով` արտերկրից հրավիրված հայ և օտարազգի աստղերի մասնակցությամբ։
Հիշեցնենք` հայ մեծանուն կոմպոզիտոր Արամ Խաչատրյանի ծննդյան 120-ամյակի կապակցությամբ hունիսի 6, 7, 8-ին Երևանի Թումոյի այգում Ալեքսանդր Սպենդիարյանի անվան օպերայի և բալետի ազգային ակադեմիական թատրոնը՝ Կարեն Դուրգարյանի ղեկավարությամբ, ներկայացրեց կոմպոզիտորի բալետային ստեղծագործությունները:
Ծրագրում ընդգրկված էին «Գայանե», «Դիմակահանդես», «Սպարտակ» բալետները։