ԵՐԵՎԱՆ, 23 օգոստոսի — Sputnik. Երևանի ավագանու ընտրությունները 2018 թվականից հետո եզակի են անկանխատեսելիությամբ, և արդյունքները կախված են լինելու մարդկանց կամարտահայտությունից։ Այսօր` քարոզարշավի առաջին օրը լրագրողների հետ զրույցում նշեց «Լուսավոր Հայաստան» կուսակցության կողմից առաջադրված քաղաքապետի թեկնածու Դավիթ Խաժակյանը։
«Իմ շանսերը գնահատելու են երևանցիները. 6 տարի շարունակ ես աշխատել եմ որպես ավագանու ընդդիմադիր անդամ, մեր ուժն ունեցել է 1 մանդատ, և այդ 1 մանդատով մենք արել ենք առավելագույնը, ընդհուպ համաքաղաքային խնդիրները լուծելու իմաստով։ Մարդկանց աջակցությունից է կախված լինելու այն մասշտաբը, որ մենք կհաղորդենք ընտրությունների արդյունքներով»,– ասաց Խաժակյանը։
Խոսելով այն մասին, թե իրենք առաջնային ինչ խնդիրներ են պատրաստվում Երևանում լուծել, եթե քաղաքային իշխանություն դառնան, Խաժակյանը մատնանշեց համատիրությունների հարցը։ Շեշտեց` իրենք միակ քաղաքական ուժն են, որը նախընտրական ծրագրում ներառել են այս խնդիրը։
«Մենք հստակ ասում ենք` պետք է դրանք վերացվեն, այն 4 մլրդ դրամը, որ հավաքագրվում է համատիրությունների կողմից, ամբողջությամբ պետք է ներդրվի բազմաբնակարան շենքերի բարեկարգման աշխատանքներում, իսկ այսօր դրանք 70-80 տոկոսով ծառայում են համատիրությունների ադմինիստրատիվ ծախսերին»,– նշում է Խաժակյանը։
Բազմաբնակարան շենքերը քաղաքային տնտեսության հսկայական մասն են կազմում։ Նրա խոսքով` քաղաքը բյուջեից 2,6 մլրդ դրամ է տրամադրում բազմաբնակարան շենքերի բարեկարգման համար, մինչդեռ կա 4 մլրդ, որը, ըստ նրա, կարելի է ասել` վատնվում է։
Նա խոսեց նաև քաղաքում շարունակվող հախուռն շինարարության մասին, որն իրականացվում է առանց հաշվի առնելու տեղի ենթակառուցվածքներն ու հնարավորությունները։
Խաժակյանի խոսքով` իրենք ընտրություններին մասնակցող բոլոր ուժերին մրցակից են համարում, հարգանքով վերաբերվում։ Ինչ վերաբերում է հնարավոր կոալիցիաներին, նրա կարծիքով, այս պահին նման զրույցներն անիմաստ են, որովհետև միայն սեպտեմբերի 17-ի երեկոյան կուրվագծվի, թե ինչ վերաձևավորումներ են լինելու Երևանի քաղաքային իշխանությունների կազմում։
Հիշեցնենք` Երևանի ավագանու ընտրություններին մասնակցելու հայտ են ներկայացրել հետևյալ ուժերը.
«Հանրային ձայն» կուսակցություն1.
«Քաղաքացիական պայմանագիր» կուսակցություն2.
«Արդար Հայաստան» կուսակցություն3.
«Հաղթանակ» կուսակցություն4.
«Ուժը հայրենյաց» կուսակցություն5.
Հայաստանի եվրոպական կուսակցություն6.
«Ազգային առաջընթաց» կուսակցություն7.
«Հանուն սոցիալական արդարության» կուսակցություն8.
«Հանրապետություն» կուսակցություն9.9.
«Միացյալ Հայաստան» կուսակցություն10.
«Լուսավոր Հայաստան» կուսակցություն11.
«Ժողովրդավարական համախմբումը» կուսակցություն12.
«Ապրելու երկիր» կուսակցություն13.
«Մայր Հայաստան» (կազմում՝ «Երկիր Ծիրանի» և «Ինտելեկտուալ Հայաստան» կուսակցությունները) դաշինք14.
Երևանի ավագանու ընտրությունները կկայանան սեպտեմբերի 17–ին։ Նախընտրական քարոզարշավը մեկնարկել է օգոստոսի 23–ին, կավարտվի սեպտեմբերի 15–ին։