Լեյբլի երգիչը, որի պրոդյուսերն ադրբեջանցի է, Երևանում համերգ կտա. օգտատերերը վրդովված են

ԵՐԵՎԱՆ, 21 օգոստոսի – Sputnik. Ադրբեջանցի երգիչ Էլմանին պատկանող երաժշտական «RAAVA MUSIC» լեյբլի հետ աշխատող երգիչ Անդրոն օգոստոսի 30-ին համերգով հանդես կգա Երևանում։ Այս մասին տեղեկանում ենք համերգի կազմակերպչի` «StageMuse» ընկերության սոցցանցերի էջերից։

Անդրոն (իսկական անունը Իոան Ժանի Կուզնեցով) ՌԴ–ում է հանդես գալիս, ռեպ կատարող է, գնչուական ծագում ունի։

Սոցցանցերում նրա համերգի վերաբերյալ լուրն այդքան էլ չի ուրախացրել որոշ օգտատերերի, քանի որ լեյբլի հիմնադիր, պրոդյուսեր Էլմանը (Էլման Զեյնալով) 2020 թվականին 44-օրյա պատերազմի օրերին սոցցանցերում` ի պաշտպանություն Ադրբեջանի հրապարկումներ էր անում։

Բազմաթիվ օգտատերեր «Ինսթագրամում» իրենց վրդովմունքն են հայտնել` գրելով. «Մենակ ադրբեջանցիներն էին պակաս Հայաստանում համերգ տային», «Ամթո է», «Այդ գումարները ադրբեջանցու գրպան են գնալու» և այլն։

Կային օգտատերեր, որոնք անկախ ամեն ինչից ցանկանում են, որպեսզի Անդրոն գա Հայաստան։

Նշենք` համերգը սկզբում նախատեսված էր, որ պետք է կայանար «Վելոտրեկ+»-ում, սակայն ըստ կազմակերպիչների` տեխնիկական խնդիրների պատճառով այն տեղափոխվել է «Մերիդիան» ցուցահանդեսի կենտրոն։

Տոմսերը վաճառվում են 12.000 դրամով, այդ օրը դրանք վաճառվելու են 15.000 դրամով։

Հիշեցնենք, որ Երևանում օրեր առաջ չեղարկվել է օգոստոսի 12-ին նախատեսված Little Big խմբի համերգը։