ԵԱՏՄ–ում վճարային նոր համակարգեր ստեղծելը հնարավոր է. տնտեսագետ

ԵՐԵՎԱՆ, 21 օգոստոսի – Sputnik. ԵԱՏՄ տարածքում և՛ տեսական, և՛ գործնական առումով հնարավոր է վճարային նոր համակարգեր ստեղծել և ունենալ այլընտրանք։ Այս մասին Sputnik Արմենիա մուլտիմեդիոն մամուլի կենտրոնում ասաց տնտեսագետ Թաթուլ Մանասերյանը` մեկնաբանելով ՌԴ ԱԳՆ տնտեսական համագործակցության դեպարտամենտի տնօրեն Դմիտրի Բիրիչևսկի հայտարարությունը։

Ավելի վաղ ՌԴ ԱԳՆ–ից հայտնել էին, որ Մոսկվան կանխատեսում է վճարային նոր համակարգերի ստեղծում, որոնք կախված չեն լինի արևմտյան երկրների ֆինանսական ճարտարապետությունից։

Մանասերյանը նշում է, որ ոչ միայն ՌԴ–ի, այլև ԵԱՏՄ երկրների առջև նոր համակարգի ստեղծման խնդիրը վաղուց է դրված։ Այսօր ռուս–ուկրաինական հակամարտության արդյունքում կիրառվող պատժամիջոցները պարզապես ստիպում են արագացնել քայլերը։

Տնտեսագետը հակված է կարծելու, որ դա կլինի վիրտուալ արժույթ։ Նա որպես օրինակ նշում է, որ կարող է լինել միասնական արժույթ, ինչպես եվրոպացիները ստեղծեցին ժամանակին` 1979 թվականին, եվրոպական արժույթային միությունը, որից 21 տարի անց միայն եվրոն մտավ շրջանառության մեջ։

«Իսկ այսօր հատկապես էլեկտրոնային արժույթների թվային դարաշրջանում շատ ավելի արագ տեղի կունենա այս գործընթացը։ ԵԱՏՄ անդամներն իրենց երկրների ներսում ունեն արդեն թվային արժույթներ, էլեկտրոնային արժույթներ։ Սա կարող է ավելի կառավարելի դառնալ, կանոնակարգվել։ Բոլոր 5 երկրները պետք համաձայնեցնեն հարկային, հակաբյուջետային քաղաքականությունը, արժույթային քաղաքականությունը` բոլոր ուղղություններով»,–հավելեց փորձագետը։

Իսկ թե երբ հանրությունը պատրաստ կլինի այդ նոր արժույթով իր գործարքներն իրականացնելուն, Մանասերյանը դժվարացավ նշել` ընդգծելով, որ դա կսկսի հանրության շրջանում կիրառելի դառնալ այն դեպքում, երբ քաղաքացին հասկանա` որն է իր տնտեսական շահը և որ եղանակով է հարմար իր գործարքն իրականացնել։ Այս դեպքում հանրային իրազեկում է անհրաժեշտ։