ԵՐԵՎԱՆ, 20 օգոստոսի – Sputnik. Լեռնային Ղարաբաղում հումանիտար իրավիճակի սրումը կարող է լուրջ հարվածի տակ դնել տարածաշրջանում կայունության հաստատման հարցում Հայաստանի և միջազգային հանրության ջանքերը: ԱԳՆ մամուլի ծառայության հաղորդմամբ` այս մասին ասել է ՀՀ ԱԳ նախարար Արարատ Միրզոյանը ՀՀ–ում Եվրոպական միության պատվիրակության ղեկավար, դեսպան Անդրեա Վիկտորինի հետ հանդիպման ժամանակ։
Հանդիպման ընթացքում անդրադարձ է արվել Հայաստանում ԵՄ քաղաքացիական մշտադիտարկման առաքելության գործունեությանն առնչվող խնդիրների:
Քննարկվել են տարածաշրջանային անվտանգության ու կայունության հարցերը: Միրզոյանը խոսել է Լաչինի միջանցքի ապօրինի արգելափակման հետևանքով Լեռնային Ղարաբաղում ժամ առ ժամ խորացող մարդասիրական ճգնաժամի վերացման ուղղությամբ քայլեր իրականացնելու հրատապության մասին։
«Ընդգծվել է, որ ՄԱԿ Անվտանգության խորհրդում կայացած քննարկումը ևս ցույց տվեց ԼՂ ժողովրդի համար հումանիտար ճգնաժամի ծանր հետևանքների գիտակցումը և Լաչինի միջանցքի՝ 2020թ. նոյեմբերի 9-ի հայտարարության և Արդարադատության միջազգային դատարանի՝ փետրվարի 22-ի և հուլիսի 6-ի որոշումներին համապատասխան վերաբացման կարևորությունը»,– նշված է հաղորդագրության մեջ:
Նշենք, որ ՀՀ արտաքին քաղաքական գերատեսչության ղեկավարն ընդունել էր ԵՄ դեսպանին Հայաստանում վերջինիս դիվանագիտական առաքելության ավարտի կապակցությամբ: Արարատ Միրզոյանը նշել է, որ բարձր է գնահատում դեսպանի ներդրումը ՀՀ-ԵՄ գործընկերության զարգացման գործում, ընդգծել նրա պաշտոնավարման ընթացքում արձանագրված կարևոր ձեռքբերումները և հանձնել ՀՀ ԱԳՆ պատվո մեդալ:
Հիշեցնենք, որ գերմանացի դիվանագետ Անդրեա Վիկտորինը Հայաստանում Եվրամիության դեսպան էր նշանակվել 2019 թ.։ 2007-2009թթ նա Հայաստանում Գերմանիայի դեսպանն էր։