ԵՐԵՎԱՆ, 19 օգոստոսի – Sputnik. Ադրբեջանի զինված ուժերը մի քանի օր է՝ կրակի տակ են պահում Ասկերանի շրջանի Սարուշեն համայնքի ցորենի միակ դաշտը՝ զրկելով բնակիչներին հաց ունենալու հնարավորությունից։ Տեղեկությունը հայտնում է Արցախի պետնախարար Գուրգեն Ներսիսյանը։
Նշենք, որ ադրբեջանական կողմն արդեն ավելի քան 8 ամիս է՝ շրջափակման մեջ է պահում Արցախի ժողովրդին և զրկում նրանց Հայաստանի Հանրապետության հետ կապից։
«Ադրբեջանը նաև ռազմական ուժի կիրառմամբ կամ դրա սպառնալիքով անընդհատ խոչընդոտներ է ստեղծում քաղաքացիական բնակչության կողմից իրենց առօրյա խնդիրները լուծելու հարցում: Արդեն մի քանի օր է՝ Սարուշենի բնակիչները հացի խնդիրը լուծելու համար փորձում են հավաքել գյուղի միակ ցորենի դաշտի բերքը, սակայն մոտակայքում տեղակայված ադրբեջանական դիրքերից պարբերաբար թիրախավորվում են դաշտին մոտեցող մարդիկ ու գյուղատնտեսական տեխնիկան»,– գրել է Ներսիսյանը:
Նրա խոսքով` ամեն անգամ Արցախում ռուս խաղաղապահները հունձի օրն ու ժամը համաձայնեցնում են ադրբեջանական կողմի հետ և դրանք կազմակերպվում են տեղում խաղաղապահների ներկայությամբ։ Այդուհանդերձ աշխատանքները սկսվելուն պես հրաձգային տարբեր զինատեսակներից սկսվում է անդադար կրակը, ինչից հետո դրանք անմիջապես դադարեցվում են, իսկ քաղաքացիական անձինք խաղաղապահների օգնությամբ տեղափոխվում են անվտանգ վայր:
Հիշեցնենք, որ օգոստոսի 17-ին ադրբեջանական ԶՈւ–ն 2 անգամ հրաձգային զենքից կրակել է Սարուշեն համայնքի դաշտերում աշխատող կոմբայնի ուղղությամբ։
Օգոստոսի 12-ին էլ են կրակել ցորենի դաշտի ուղղությամբ, այս անգամ՝ աշխատող քաղաքացիական անձանց ուղղությամբ։
Օգոստոսի 9-ին նույնպես կրակոցներ են հնչել ցորենի դաշտում։ Արձակված կրակոցներից վնասվել էր գյուղատնտեսական աշխատանքներում ներգրավված՝ Ա.Ղ.-ի վարած «Ֆորդ-Տրանզիտ» ավտոմեքենայի դիմացի երկու դռների ապակիները։