ԵՐԵՎԱՆ, 17 օգոստոսի, Sputnik - Խաչիկ Չախոյան. Երևանի «Փյունիկը» սեփական հարկի տակ պարտվելով նորվեգական «Բուդյո Գլիմտին» նաև երկրորդ խաղում՝ դուրս մնաց Կոնֆերենցիաների լիգայից։ Հյուրերը հաղթեցին 3։0 հաշվով։
Իրոք շատ դժվար էր պատկերացնել, որ «Փյունիկը» կկարողանա հաղթանակի հասնել «Բուդյո Գլիմտի» նկատմամբ երկու հանդիպումների արդյունքով։ Բայց կոնկրետ պատասխան խաղում հաղթելու հնարավորություն կար, և հայկական թիմը առաջին խաղակեսի մեկնարկում շատ ակտիվ էր գործում։ Հյուրերը շատ լավ հասկանում էին, որ կարևորը իրենց դարպասն անառիկ պահելն է, ու երկար խաղարկումներով անընդհատ փորձում էին գցել խաղի տեմպը։ Խաղը հավասարվեց, իսկ դրա արդյունքում էլ մրցակիցը վաստակեց 11 մետրոնոց հարված։ Ամալ Պելեգրինոն նշակետից հարվածով առաջ մղեց նորվեգական թիմին առաջին կեսի հիմնական ժամանակի ավարտից երկու րոպե առաջ։
Տեսականորեն ֆուտբոլում հնարավոր է 4 գնդակ հետ բերել մեկ խաղակեսի ընթացքում։ Բայց գործնականում դա ֆանտաստիկայի ժանրից է։
Երկրորդ խաղակեսի մեկնարկում ամեն ինչ իր տեղն ընկավ։ «Փյունիկը» չնայած մեծ ցանկությանը, չկարողացավ ինչ-որ բան փոխել կարգով ու վարպետությամբ իրեն գերազանցող թիմի հետ խաղում։ Պատրիկ Բերգը կրկնապատկեց «Բուդյո Գլիմիտի» առավելությունը, և սա արդեն նաև հոգեբանական լուրջ առավելություն տվեց մրցակցին։ Խփած գոլից ընդամենը մի քանի րոպե անց Տոբիելդ Ֆլեյդ-Գուլիկսենը խփեց երրորդ գոլը։ Երկու խաղերի արդյունքում նորվեգացիները հաղթեցին ընդհանուր 6։0 հաշվով։
Եվրոպական ֆուտբոլային աշուն այս մրցաշրջանում Հայաստանի ակումբները չպարգևեցին երկրպագուներին։ Չեմպիոնների լիգայում, հետո էլ Կոնֆերենցիաների լիգայում պարտվեց մեր չեմպիոն «Ուրարտուն», իսկ մեր մյուս ակումբները՝ «Ալաշկերտը», «Արարատ-Արմենիան» և «Փյունիկը» դուրս մնացին Կոնֆերենցիաների լիգայի խաղարկությունից։