ԵՐԵՎԱՆ, 17 օգոստոսի – Sputnik. ՄԻՊ արագ արձագանքման խումբը ոստիկանության կենտրոնական բաժնում օգոստոսի 16-ի լույս 17-ի գիշերն առանձնազրույցներ է ունեցել Մաշտոցի պուրակից բերման ենթարկված անձանց հետ։ Այս մասին հաղորդագրություն է տարածել ՄԻՊ-ը։
Կեսգիշերին ոստիկանները Մաշտոցի պուրակից բերման ենթարկեցին «Քաղաքացու որոշում» սոցիալ-դեմոկրատական կուսակցության հիմնադրին` Սուրեն Սահակյանին և երկու անդամներին՝ Վահագն Մինասյանի ու Հայկ Սահակյանի։ Նրանք փորձում էին վրան տեղադրել։
«ՄԻՊ-ը բերման ենթարկված քաղաքացիներին ներկայացվել են նրանց իրավունքները»,-նշվում է հաղորդագրությունում։
Հանդիպման ժամանակ բարձրացված խնդիրների վերաբերյալ ՄԻՊ աշխատակազմի ներկայացուցիչները քննարկումներ են անցկացրել նաև ոստիկանության կենտրոնական բաժնի ներկայացուցիչների հետ։
Սահակյանն ավելի ուշ հայտնել է, որ բերման ենթրակվածները ազատ են արձակվել լուսադեմին՝ ժամը 4։00-ին։