ԵՐԵՎԱՆ, 17 օգոստոսի – Sputnik. Ճանապարհների սպասարկման խնդիրը լուրջ ուշադրության կարիք ունի։ Կառավարության նիստում այս հայտարարությունն արեց ՀՀ վարչապետ Նիկոլ Փաշինյանը` անդրադառնալով Գյումրի–Երևան ավտոճանապարհին տեղի ունեցած վթարին։
«Վթարից անմիջապես հետո փորձել ենք հասկանալ, թե ինչ կարող էին անել ծառայությունները վթարը կանխարգելելու համար։ Առաջին միտքը եղել է այն, որ գուցե վարորդները համապատասխան փաստաթղթեր չեն ունեցել, սակայն այդ մասով խնդիր չի եղել, խախտումների հետագծում էլ ոչ մի առանձնահատուկ բան չի եղել, դրանք աննշան են եղել։ Վթարի մասնակից երկու մեքենան էլ եղել են ապահովագրված, տեխզննումներն անցած»,– ասաց նա։
Փաշինյանը նշեց, որ ՀՀ տարածքային կառավարման և ենթակառուցվածքների նախարար Գնել Սանոսյանի հետ պայմանավորվել են, որ պետք է լրջորեն զբաղվեն ճանապարհային անվտանգության հարցերով։
«Ճանապարհի կառուցման պահից պետք է պատշաճ սպասարկվի այն։ Դա ճանապարհի կյանքը երկարացնելու, պետական միջոցները խնայելու և երկրի վարկանիշի, մարդկանց հարմարավետության, անվտանգության մասին է խոսքը։ Այս մասով մենք պետք է միջոցներ ձեռնարկենք հատկապես Շիրակի մարզում տեղի ունեցած ողբերգական վթարից հետո»,– ասաց Փաշինյանը։
ՀՀ քննչական կոմիտեի նախագահ Արգիշտի Քյարամյանը շեշտեց, որ դեպքի առնչությամբ փորձաքննություն է նշանակված։ Պետք է հասկանան` խախտում եղել է, թե ոչ, ինչից հետո էլ պարզ կդառնա, թե ով է մեղավոր եղել։
Հիշեցնենք` օգոստոսի 14-ին` ժամը 00:20-ի սահմաններում, Լանջիկ գյուղի վարչական տարածքում բախվել են «Volkswagen» մակնիշի ուղևորափոխադրող միկրոավտոբուսը և 33-ամյա Հ.Պ.–ի վարած «ZIL» մակնիշի բեռնատարը։ Վթարի զոհ է դարձել 11 մարդ։ Խումբը վերադառնում էր Արևմտյան Հայաստանից։