ԵՐԵՎԱՆ, 16 օգոստոսի – Sputnik. Մի խումբ մարդիկ Ստեփանակերտի օդանավակայանում ակցիա են կազմակերպել` ավտոմեքենայով փակելով ՌԴ խաղաղապահների տեղակայման վայրի մուտքը: Այս մասին գրում է «Արմենպրեսը»։
Նրանք պահանջել են ապաշրջափակել Լաչինի միջանցքը և այդ նպատակով ապահովել խաղաղ ավտոերթի անվտանգությունը դեպի Հակարի կամուրջ (միջանցքի սկիզբ- խմբ.): Չստանալով իրենց նամակի պատասխանը ՝ շարժման մասնակիցները մեքենայով փակել են բազայի մուտքը և վիճաբանություն սկսել։
Խաղաղապահները ձեռքերով հետ են մղել մուտքը փակող մեքենան և այնտեղ զրահամեքենա տեղադրել ՝ տեղամասը վերահսկելու համար։
Հիշեցնենք` 2022–ի դեկտեմբերի 12-ին քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակեցին Արցախը Հայաստանին կապող Ստեփանակերտ-Գորիս մայրուղին, որտեղից հեռացան ապրիլի 28-ին, քանի որ ապրիլի 23-ին Ադրբեջանն անցակետ տեղադրեց Լաչինի ճանապարհի վրա` այն ամբողջությամբ առնելով իր վերահսկողության տակ։ Արցախը զրկվել է նաև Հայաստանից մատակարարվող գազից և էլեկտրաէներգիայից։
Հուլիսի 26-ին առաջին անհրաժեշտության շուրջ 400 տոննա ապրանքով բեռնված 19 բեռնատար Երևանից ուղևորվեցին շրջափակման մեջ գտնվող Արցախ։ Բեռնատարները հասել են Սյունիքի Կոռնիձոր համայնք և մինչ օրս կանգնած են Լաչինի միջանցքի սահմանին։