ԵՐԵՎԱՆ, 16 օգոստոսի – Sputnik. «Երևանի Մխիթար Հերացու անվան պետական բժշկական համալսարան» հիմնադրամի ֆինանսատնտեսական աշխատանքների գծով նախկին պրոռեկտորի նկատմամբ հետախուզում է հայտարարվել՝ փողերի լվացման համար։ Այս մասին տեղեկանում են ՀՀ քննչական կոմիտեի լրատվական ծառայությունից։
Մասնավորապես նշվում է, որ 2015-2016թթ. Հիմնադրամի ֆինանսատնտեսական աշխատանքների գծով պրոռեկտոր հանդիսացող Կ.Հ.-ն «Հերացի» արհեստակցական կազմակերպության տնօրեն Մ.Ս.-ի և «Արև-Շին» ՍՊ ընկերությունը փաստացի ղեկավարող Ռ.Դ.-ի կողմից ձևական պայմանագրեր է կնքել և կազմակերպել հանցավոր ծագում ունեցող առանձնապես խոշոր չափերով դրամական միջոցների փոխանցումն ու փոխարկումը։
Խոսքը 16.800.000 ՀՀ դրամի մասին է, որը ԵՊԲՀ–ի հիմնադրամից 2015-2016թթ. ընթացքում «Հերացի» արհեստակցական կազմակերպության բանկային հաշիվներում որպես անդամակցության վճար ավել փոխանցված, ինչպես նաև այլ պատրվակներով փոխանցված և այդ կերպ հափշտակված գումարների մասին է։
Այդ գումարին օրինական տեսք տալու և այն օրինական շրջանառության մեջ ներգրավելու, այդ կերպ հիշյալ գումարի իրական բնույթը, ծագման աղբյուրը թաքցնելու և դրա փոխանցումն ապահովելու համար հիմնվել է «Արև-շին» ՍՊ ընկերությունը, որը ղեկավարել է նախկին պրոռեկտորի մտերիմ «Դավթյան հայր և որդիներ» ՍՊ ընկերությունը փաստացի ղեկավարող Ռ.Դ.-ն։
Այդ ընկերության և «Հերացի» արհեստակցական կազմակերպության նախագահի հետ կնքվել է կեղծ պայմանագիր և Մ.Ս–ի մտերիմի` «Դավթյան հայր և որդիներ» ՍՊ ընկերությանը պատկանող, Սևան քաղաքում գտնվող «Աստերիս» հանգստյան գոտում իբր կազմակերպվել է Հիմնադրամի 224 աշխատակիցների հանգիստը երկու փուլով։
««Աստերիս» հանգստյան գոտում Հիմնադրամի որևէ աշխատակցի հանգիստը փաստացի չկազմակերպելով՝ 2016թ. հուլիսի 29-ին «Հերացի» արհեստակցական կազմակերպության և «Արև-շին» ՍՊ ընկերության միջև կազմվել և ստորագրվել է ծառայությունների մատուցման վերաբերյալ հանձնման-ընդունման կեղծ ակտ»,–նշվում է հաղորդագրությունում:
Ձեռք բերված բավարար փաստերի հիման վրա՝ Կ.Հ.-ի նկատմամբ հարուցվել է քրեական հետապնդում՝ ՀՀ նախկին քրեական օրենսգրքի 38-190-րդ հոդվածի 3-րդ մասի 1-ին կետով (Հանցավոր ճանապարհով ստացված եկամուտներն օրինականացնելը):
Կ.Հ.-ն քրեական վարույթը հարուցվելուց հետո` 2023 թվականի ապրիլի 20-ին, հեռացել է ՀՀ-ից:
Վարույթն իրականցնող մարմինը Կ.Հ.-ի նկատմամբ կալանքը որպես խափանման միջոց կիրառելու միջնորդություն է ներկայացրել դատարան, որը բավարարվել է, և հայտարարվել է հետախուզում: