Շիրակի մարզում ողբերգական ավտովթարից տուժածներին է այցելել Անահիտ Ավանեսյանը

ԵՐԵՎԱՆ, 15 օգոստոսի – Sputnik. 11 մարդու մահվան պատճառ դարձած ողբերգական ավտովթարից տուժածներին է տեսակցել առողջապահության նախարար Անահիտ Ավանեսյանը։ Տեղեկությունը հայտնում է ԱՆ մամուլի ծառայությունը։

Շիրակի մարզում տեղի ունեցած վթարի հետևանքով Երևանի «Սուրբ Գրիգոր Լուսավորիչ» բժշկական կենտրոնում գտնվող երկու տուժածներից մեկը շարունակում է գտնվել վերակենդանացման բաժանմունքում։ Մյուս տուժածն արդեն տեղափոխվել է բաժանմունք:

Օգոստոսի 14-ին կեսգիշերից հետո Գյումրի–Երևան ճանապարհին վթարի ենթարկված միկրոավտոբուսում 17 անձ է եղել։ 11-ը մահացել են, մեկին հենց գիշերն են տեղափոխել Երևան` թիվ 1 համալսարանական կլինիկա, մյուս 5–ին` «Գյումրի» ԲԿ։ Տուժածներից 3-ին օգոստոսի 14-ին առավոտյան տեղափոխել են մայրաքաղաքի բուժկենտրոններ, 1-ին` «Աստղիկ» ԲԿ, 2-ին` «Սուրբ Գրիգոր Լուսավորիչ» բուժկենտրոն։

Ըստ առողջապահության նախարարության` «Երևանի Մ. Հերացու անվան պետական բժշկական համալսարան» հիմնադրամում գտնվող տուժածի առողջական վիճակը կայուն է։ Նա գտնվում է վերակենդանացման բաժանմունքում: «Աստղիկ» բժշկական կենտրոնում գտնվող տուժածի առողջական վիճակն էլ միջին ծանրության է, նա ևս վերակենդանացման բաժանմունքում է:

Հիշեցնենք` օգոստոսի 14-ին` ժամը 00:20-ի սահմաններում, Լանջիկ գյուղի վարչական տարածքում բախվել են «Volkswagen» մակնիշի ուղևորափոխադրող միկրոավտոբուսը և 33-ամյա Հ.Պ.–ի վարած «ZIL» մակնիշի բեռնատարը։ Վթարի զոհ է դարձել 11 մարդ։ Տուժածների հարազատները Sputnik Արմենիայի թղթակցի հետ զրույցում հայտնել են, որ խումբը վերադառնում էր Արևմտյան Հայաստանից, ուր մեկնել էր «Համշեն տուր» ընկերության հետ։